Грузияда президенттик шайлоо өтүп жатат. Өлкө тарыхында биринчи жолу мамлекет башчысын эл эмес, парламент имаратындагы шайлоочулар коллегиясы шайлайт.
Жаңы президент 300 парламентарийден жана түрдүү деңгээлдеги депутаттардан турган комиссия тарабынан шайланат. 300 адамдын ичинен бийликтеги “Грузин кыялы” партиясында 211 делегат бар. Бардык процесс парламенттин сайтында жана социалдык тармактарда түз көрсөтүлүүдө. Биринчи турда шайлоодо шайлоочулардын кеминде 2/3 добушун алган талапкер жеңет.
Президенттикке жалгыз талапкер мурдагы футболчу, азыркы депутат Михаил Кавелашвили, бийликтеги “Грузин кыялы” партиясы тарабынан көрсөтүлгөн.
Шайлоо жараяны оппозициячылардын парламент имаратынын алдындагы митингдин фонунда өтүп жатат.
Учурдагы президент Саломе Зурабишвили буга чейин президенттик кызматтан кетпей турганын билдирген, анткени ал “легитимсиз парламент менен легитимдүү президенттик шайлоо болбойт” деп эсептейт.
Ал ошондой эле өзүн өлкөдөгү бийликтин жалгыз мыйзамдуу өкүлү деп жарыялаган. Ал президенттик шайлоо процессин “пародия” деп атады.
Буга премьер-министр Ираклий Кобахидзе “Зурабишвилинин эмоционалдык абалын” түшүнөрүн, бирок “инаугурация күнү, 29-декабрда ал резиденциясынан чыгып, бул имаратты мыйзамдуу шайланган президентке өткөрүп бериши керек” деди.
