Швейцариядагы узундугу 5,4 км болгон Грис мөңгүсү тез эрип жатат, себеби климаттык өзгөрүүлөр өлкө боюнча мурда болуп көрбөгөндөй муздардын эришин тездетүүдө.
Reuters агенттигинин маалыматына ылайык, бул тууралуу Швейцариянын мөңгүлөрдү көзөмөлдөө кызматы кабарлады.
«Бул — өлүп бараткан мөңгү», – деди Швейцариянын мөңгүлөрдү көзөмөлдөө кызматынын (GLAMOS) директору Матиас Хусс.
Анын айтымында, муздун калыңдыгы 2025-жылдын сентябрына чейинки болгону 12 айдын ичинде алты метрге азайган.
2000-жылдан 2023-жылга чейин өлкөнүн түштүгүндөгү Вале кантонунда жайгашкан мөңгүнүн узундугу 800 метрге кыскарган. Бүгүн ал 1880-жылга салыштырмалуу 3,2 км кыска, ал эми орточо муздун калыңдыгы 57 метрди түзөт.
Хусс Грис мөңгүсүнүн эришине 2022 жана 2023-жылдардагы узак кургакчылык, ошондой эле 2025-жылдагы ысык жай себеп болгонун белгиледи. Бул жылдагы апрель айынын ортосундагы катуу кар жаашы убактылуу жеңилдик бергенине карабастан, муздардын эришине тоскоол боло алган жок.


















