Грецияда өлкөнүн ар кайсы аймактарында уланып жаткан токой өрттөрүнөн улам көп сандаган эл отурукташкан жерди эвакуациялоо уланууда. Өрттү өчүрүү учурунда 13кө жакын өрт өчүрүүчү кызматкерлер күйүк жана башка жаракаттарды алышкан. Бул тууралуу Ggismeteo.by агенттиги жазды.
Маалыматта айтылгандай, өрттөн улам миңдеген тургундар жана туристтер жер которгон, ондогон адамдар түтүнгө ууланып ооруканага жаткырылган.
“Өрт өчүрүү кызматынын өкүлү Василис Ватракогяннистин айтымында, 13кө жакын өрт өчүрүүчү күйүк жана башка жаракаттарды алышкан. 33 учактын колдоосу менен жалпысынан 5000дей өрт өчүрүүчү ар кандай чекиттердеги өрттү өчүрүүгө тартылган”,- деп айтылат маалыматта.
Ошол эле учурда Ахея префектурасынын Патры шаарына жакын жердеги Сихена аймагында өткөн түнү чыккан өрт турак жайларга да таасирин тийгизип, тилсиз жоонун кесепетинен бир нече үй жабыркап, аймактын тургундары эвакуацияланган.
Жергиликтүү бийлик Патры шаарына жакын жердеги 7700дөй калкы бар шаардын тургундарын чыгып кетүүгө буйрук бергенден кийин, райондун эки айылынын тургундары да үйлөрүн таштап кетүүгө аргасыз болушкан.
Ошондой эле Сакыз (Хиос) аралынын түндүк-батышындагы айылдар дагы толугу менен эвакуацияланган. Өрт айыл чарба жерлерине, токойлорго, чарбаларга, кампаларга жана унааларга олуттуу зыян келтирген.
Өрткө каршы кызматкерлер ассоциациясынын төрагасы Костас Цигас акыркы 24 саат өрт мезгилинин “эң оор күндөрү” болгондугун белгиледи.
Эске сала кетсек, быйылкы жылдагы күндүн аномалдуу ысыгынан улам дүйнөнүн айрым мамлекеттеринде өрт кырсыгы мурдагы жылдарга салыштырмалуу көп катталды.
Балкан өлкөлөрү, Түркия, Португалия жана Испания да кыйраткыч тилсиз жоодон жабыркады.
Айрым аймактарда абанын температурасы азыр да 40 градуска чейин көтөрүлүүдө.

















