Бүгүн, 4-апрелде Грециянын Лесбос аралынын жээгинде мигранттарды ташыган үйлөмө кайык оодарылып кетип, жети киши, анын ичинде үч бала сууга чөгүп каза болду. Калган 23 адам куткарылган.
Бул тууралуу Euronews агенттиги жергиликтүү жээк күзөтү кызматына таянуу менен билдирди.
Маалыматка караганда, тирүү калгандар Сирия жана Ооганстандан келген качкындар болуп чыкты. Аларды тиешелүү мекеменин кызматкерлери Лесбостогу мигранттарды кабыл алуу борборуна алып кетишкен.
Европанын түштүк-чыгышы менен Жер Ортолук деңизинин чыгышында жайгашкан Грецияда көбүнчө Азиядан жана Жакынкы Чыгыштан Батыш Европага жетүүгө аракет кылган мыйзамсыз мигранттар деңиз аркылуу мыйзамсыз өтүүгө аракет кылышат.
Ал эми март айында Грециянын деңиз полициясы Түркиядан чек араны кесип өтүүгө аракет кылган контрабандист мигранттарды таштап кеткенден кийин бирөөсү каза болуп, 18и куткарылганын билдирген.
БУУнун маалыматы боюнча, өткөн жылы 2300дөн ашуун мындай өлүм катталган. Аталган уюмдун Качкындар боюнча Жогорку комиссарлыгынын маалыматы боюнча, жыл башынан бери Грецияга 9 миңге жакын адамдардын көбү деңиз аркылуу келген.
Өткөн 2024-жылы Грециянын консервативдүү өкмөтү мыйзамсыз иммиграцияга каршы саясатын катаалдаткан.
Премьер-министр Кириакос Мицотакис Греция парламентинде сүйлөгөн сөзүндө Грецияга мыйзамсыз кирүүнү каалагандардын башпаанек алууга укугу жок болсо, аларды кайтаруу үчүн бардык чаралар көрүлөрүн билдирген.

















