Лувр музейиндеги тоноо ишине байланыштуу үчүнчү шектүү Париждин чет жакасында кармалды деп бейшемби күнү BFMTV телеканалы кабарлады.
Маалыматка караганда, 19-октябрда болгон Луврду тоноодон кийин үчүнчү шектүү 29-октябрда кечинде Париждин четинде кармалып камакка алынган.
Луврду тоноо 19-октябрда болгон. Уурулар Наполеон менен императрица Жозефинага таандык болгон жыйнактагы тогуз баалуу зер буюмдарды — тиараларды, сөйкөлөрдү, шуруларды жана француз ханышалары менен императрицалары кийген төөнөгүчтөдү уурдашкан.
Экспонаттардын бири — императрица Евгения де Монтихонун жабыркаган таажысы табылып, музейге кайра кайтарылган. Кылмышкерлер музейди жети мүнөттүн ичинде тоноп кетишкен. Жалпы келтирилген зыян 88 миллион евро деп бааланууда.
Буга чейин 25-октябрда француз полициясы эки шектүүнү кармаган. Алардын бири Руасси-Шарль де Голль аэропортунда Алжирге учууга аракет кылып жатканда кармалган. Экинчиси Париждин четиндеги Сен-Дениде кармалган.
Луврды тоноого шектелип кармалган эки адам күнөөсүн жарым-жартылай мойнуна алганы кабарланган.



















