Франциянын Жогорку Марна департаментиндеги Лангр шаарында белгисиз адамдар Дени Дидронун Агартуу үйүн — француз агартуучу жазуучу жана философ Дени Дидрого арналган музейди тоноп кетишти. Бул тууралуу France Info кабарлады.
Уурулук 20-октябрда, дүйшөмбү күнү, Париждеги Луврдагы окшош окуядан көп өтпөй болгон. Таңга маал музей кызматкерлери сынган эшикти жана талкаланган көргөзмө айнегин байкашкан. Ал жактан XVIII–XIX кылымдардагы алтын жана күмүш тыйындар жоголгон.
Лангр мэриясынын маалыматына караганда, уурулар кесипкөй жана максаттуу аракеттенишкен — алар баалуу буюмдардын бир бөлүгүн гана алып кетип, калган экспонаттарга тийген эмес. Тергөөнүн версиясы боюнча, бул кылмыш мурунтан эле пландалган болушу мүмкүн.
Уурдалган тыйындар музейдин “казынасына” кирген. Ал 2011-жылы имаратты реставрациялоо учурунда куруучулар тарабынан табылган. Коллекцияда 1633 күмүш жана 319 алтын тыйын болгон, жалпы баасы болжол менен 90 миң еврого бааланган.
Шаар бийлиги коопсуздук системасын жаңыртканга чейин түнкү күзөттү жеке коопсуздук компаниясына тапшырды. Учурда музей убактылуу жабылган, окуя боюнча тергөө жүрүп жатат.



















