АКШнын президенти Дональд Трамп акыркы убакта Индия өкмөтүнүн башчысы Нарендра Моди менен телефон аркылуу байланышууну төрт жолу аракет кылды, бирок премьер-министр ага жооп берген жок. Бул тууралуу германиялык Frankfurter Allgemeine Zeitung (FAZ) басылмасы өз булагына таянып билдирди.
«Акыркы жумаларда Трамп Индиянын премьер-министри менен байланышууга төрт жолу аракет кылды. Бирок ал сүйлөшүүдөн баш тартты», — деп айтылат материалда.
Журналисттердин айтымында, Моди азырынча америкалык лидер менен сүйлөшүүнү каалабайт. Себеби Трамп Индиянын экономикасы тууралуу кемсинткен сөздөрдү айткан жана АКШ өлкөгө каршы кошумча бажы төлөмдөрүн киргизген.
6-августта Трамп Индиянын россиялык мунай сатып алуусуна жооп катары индиялык товарларга 25% кошумча бажы салыгын киргизген жарлыкка кол койгон. Кийинчерээк Трамп бул көрсөткүчтү 50%га чейин жогорулатуу менен коркуткан.
Bloomberg агенттигинин маалыматы боюнча, АКШнын басымына карабастан Индия россиялык мунайдан баш тартууну пландаштырбайт. Анткени анын арзан баасы өлкөдө инфляцияны кармап турууга жардам берип жатат.
Мындан мурда Украина президенти Владимир Зеленскийдин Индияга баруу планы тууралуу да кабарланган.


















