Европарламенттеги социалисттик, солчул жана “жашыл” фракциялардын лидерлери Евробиримдиктин жетекчилигине Израилди Газа тилкесиндеги геноцидге айыптаган кат жолдоп, Евробиримдиктен жөөт мамлекетине каршы тез арада чара көрүүнү талап кылышты.
Бул тууралуу европалык Politico басылмасына таянуу менен чет элдик ЖМКлар жазышты.
Politico тарабынан алынган катта Еврокомиссиянын төрайымы Урсула фон дер Ляйенге, Евробиримдиктин тышкы иштер жетекчиси Кая Калласка жана Европа кеңешинин төрагасы Антониу Коштага төмөндөгүдөй кайрылуу жасалган:
“Бул кырдаалды жөн гана өзгөчө абал катары кароого болбойт: Газада геноцид болуп жатканына төгүндөлгүс далилдер бар”.
Атын атагысы келбеген европалык аткаминер басылмага Газадагы ачарчылык жасалма түрдө тутантылганын айтып, мурда болуп өткөн геноциддерге, атап айтканда, Руандадагы тутси геноцидине салыштырдыы.
“Биз Газада жасалма түрдө түзүлгөн ачарчылыкты көрүп жатабыз!, – деп билдирди ал.
Газанын Саламаттыкты сактоо министрлигинин акыркы маалыматы боюнча, анклавда 2023-жылдын октябрынан бери күчөгөн жаңжалдын курмандыктарынын жалпы саны 60 430га жетип, 148 000ден ашуун адам жаракат алган.
2025-жылдын 2-мартынан бери Газа тилкесине эл аралык гуманитардык жардам кирбей жатат. Израил мамлекетинин бийликтеринин чечими менен бардык көзөмөл-өткөрүү пункттары жабык бойдон калууда жана азык-түлүк бөлүштүрүү Израил-Америка башкарган “Газага гуманитардык жардам” фондунун (GHF) пункттарынын системасы аркылуу ишке ашырылууда.
Бирок Израилдин аскерлери жардам пункттарына келген адамдарга ок чыгаган учурлар бир нече жолу катталган. БУУнун Адам укуктары боюнча Жогорку комиссарынын башкармалыгынын билдирүүсүнө караганда, 27-майдан тартып GHF уюму иштей баштагандан бери 1054 адам гуманитардык жардам алууга аракет кылып жатып окко учкан же тебеленип каза болгон.
Анын ичинен 766 адам GHF пункттарынын жанында, 288и БУУ жана башка уюмдардын пункттары менен колонналарынын жанында мерт болгон.
Март айында Израилдин армиясы январь айында түзүлгөн ок атышпоо келишимин бузуп, анклавда согушту кайра баштаган. Египет, Катар жана АКШнын ортомчулугу менен өткөн сүйлөшүүлөрдүн бир нече айлампасында жаңжалдын тараптары жаңы келишимдин шарттары боюнча бир пикирге келе алышкан эмес.
Учурда гуманитардык жана адам укуктарын коргоо уюмдары Газа секторунда жапырт ачарчылык жайылып жатат деп коңгуроо кагышууда.
Израил эл аралык коомчулуктун басымынан кийин 26-июлдан баштап Газага абадан гуманитардык жардам таштоого макулдук берип, БУУнун агенттиктери жана башка эл аралык уюмдардан гуманитардык жүк ташыган 200дөй жүк ташуучу унааны Газа тилкесине киргизди. Андан бери бир катар араб жана Европа өлкөлөрү асмандан Газага бир нече таңгак гумжардам ташташты.
Газа тарап Израиль жарыялаган жеңилдиктерге карабай гуманитардык абал начар экенин, келген жардам дагы эле 2,4 миллион тургунга жетпей турганын билдиришүүдө.


















