Бул эргул Түркияда жашынып жүргөн жеринен кармалды. К. Кутманов апасы жетектеген КРнын жаратылыш ресурстары министрлиги менен Фондунун ишине түздөн-түз кийлигишкендиги жана долбоорду каржылоонун суммасынан 10% өлчөмүндө «откат» түрүндө алып тургандыгы далилденген.
Апасынын “эрке талтаңы” 5 чарба жүргүзүүчү субъекттен 17 миллион сомдон ашык суммада компенсация алганы аныкталган.
Ошондой эле, ал «Жашыл Мурас» КФ долбоору боюнча 7 млн 560 миң сом алган, бул каражатты чыгарып салууга себеп болгон.
“Өзүн өзү билип, өтүгүн төргө илген” К.Кутманов «Кумтөр Голд Компани» ЖАКтан түшкөн каражаттарды бөлүштүрүүдө Фонддун ишмердүүлүгүн түздөн-түз көзөмөлдөп, Жаратылыш ресурстары министрлигине өзүнүн досторун жогорку кызматтарга дайындоого жеке кызыкчылыгын ишке ашырып турган.
Эске салсак, 2021-жылдан азыркы мезгилге чейинки мезгилде «Кумтөр Голд Компани» ЖАКтын каражаттарынан Кыргыз Республикасынын айлана-чөйрөнү коргоо боюнча долбоорлорун ишке ашырууга жыл сайын 3 млн 700 миң АКШ доллары өлчөмүндө каражат (КР Улуттук банкынын курсу боюнча 325 млн. сом) бөлүнгөн. 3 жылдык каржылоонун жалпы суммасы 976 миллион 800 миң сомго жакын.
Кыргыз Республикасынын Эсептөө палатасынын корутундусуна ылайык, “Ишкердикти өнүктүрүү фонду” (ИӨФ) 720 миллион сомду башка максаттарга пайдаланып, анын ичинен мамлекетке 192 миллион сомго жакын зыян келтирилген. Улуттук коопсуздук органдары мамлекеттин кирешесине 56 миллион сом кайтарды.
Бүтүндөй бир министрликти жеке менчик ишканадай башкарып байлыкка туйтунган энеси менен баласынын окуясы башкаларга сабак болушу керек.
Азыр башка заман. Уурдасаң УКМК жердин түбүнөн болсо да таап келип жазага таратат.
Бакай Абдымалик.


















