Египеттин тышкы иштер министри Бадр Абдулати Египет менен Газанын чек арасындагы «Рафах» көзөмөл өткөрмө пунктунда Палестина премьер-министри Мухаммед Мустафа менен биргелешкен маалымат жыйынында билдирүү жасады.
Министрдин айтымында, Каир аталган «Улуу Израил» долбоорун түзүү чакырыктарын кабыл албайт. Ал палестиналык эл блокада жана системалуу ачарчылык менен бетме-бет келип жатканын, израилдик оккупациянын коркунучтары жана пландары чоң тынчсыздануу жаратып жатканын белгиледи.
Абдулати Египеттин позициясы өзгөрбөгөнүн баса белгилеп, өлкө мыйзамсыз көчүрүү аракеттерин же демографиялык баланс өзгөртүүгө багытталган аракеттерди кабыл албай турганын билдирди.
«Палестина оор гуманитардык кырдаалды баштан кечирүүдө, биз “Улуу Израил” деп аталган билдирүүлөрдү четке кагабыз. Газага гуманитардык жардам жеткирүүдө кыйынчылыктарга карабастан, Египет жана Катар ок атууну токтотуу жана кан төгүүнү басуу үчүн тынымсыз аракет кылууда», – деди ал.
Министрдин маалыматына караганда, Рафах аркылуу кирген гуманитардык жүктөрдүн 70%ын Египет камсыздайт, бирок азыр болжол менен 5 миң жүк ташуучу унаа чек арада кирүүгө уруксат күтүп турат.
«Израилдин оккупациялык бийлиги палестин тараптын КППдагы ишин чектөөдө. Биз Газага бардык керектүү жардамды берүүгө даярбыз, бирок бул блокаданын токтотулушун талап кылабыз», – деп кошумчалады ал.
Газадагы сүйлөшүүлөр боюнча Абдулати Каир эч кандай диктаттарды кабыл албай турганын жана туруктуу ок атышпоого жетишүүгө үмүттөнөрүн билдирди.
Министр эл аралык коомчулукту Израилге басым кылууну улантууга чакырды:
«Биз Газадагы калкты мажбурлап көчүрүү аракеттерин толук түрдө четке кагабыз», – деди ал.
Ошондой эле ал палестиналыктардын азапка кабылышы эл аралык укукка каршы келерин жана адамдык абийирди тебелеп жатканын белгиледи. Египет бул процессте адилетсиздикке эч качан шериктеш болбой турганын кошумчалады.


















