Шаардык администрация иш чаралардын убактысын жылдырууну чечти.
Душанбеде быйыл эл аралык Нооруз майрамын белгилөө ыйык Рамазан айына туш келет.
Шаар мэриясы буга байланыштуу майрам негизинен кечки убакытта өтөрүн маалымдашты.
«Бул чечим ыйык Рамазан айында орозо кармагандар да майрамды белгилеши үчүн кабыл алынды», – дешти ведомстводон.
Рамазан айы быйыл 11-мартта башталып, 11-апрелге чейин созулат. Орозо учурунда күндүзү оозу жабыктар тамак жешпейт жана суу ичишпейт.
Маалыматка ылайык, майрамдык иш чаралар 19-20-мартта баардык шаардык парктарда кечинде өткөрүлөт.
«Жергиликтүү ашпозчулар улуттук ашканананын тамактарын даярдашат, аялдар чоң казандарда сүмөлөк кайнатышат», – деп билдирди шаар бийлигиндеги булак.
Анын айтуусунда, майрамдык салтанаттар Шохмансур районундагы «Куруши Кабир» паркында, И. Сомони районундагы Айни атындагы паркта, Фирдавси районундагы Фирдавси атындагы паркта жана Сино районундагы Омар Хайям парктарында өтөт.
Быйылкы жылы Нооруздун урматына негизги майрамдык салтанаттар борбор калаанын «Истиклол» аянтында 21-мартта Тажикстандын президентинин катышуусунда белгиленет.
Мэриянын маалыматы боюнча, бул күнү шаар төрагасы Рустам Эмомалинин токтомуна ылайык, «Нооруз карнавалы» жүрүшү болуп, маданий жана көңүл ачуучу программалар, ар түрдүү спорттук мелдештер жана майрамдык сейилдөөлөр уюштурулат.
Эртеси күнү, 22-мартта туризм боюнча комитет «Ирам кудайларында» (Ботаникалык бак) Нооруздун салттарына арналган иш чара өткөрөт.
Нооруз – астрономиялык жана күн календары боюнча иран, түрк элдеринде жаз келген жана Жаңы жыл майрамы болуп саналат. 2010-жылы 23-февралда БУУнун Башкы Ассамблеясы 21-мартты эл аралык Нооруз майрамы катары тааныган. Нооруз ошондой эле ЮНЕСКОнун адамзаттын материалдык эмес маданий мурасы Репрезентативдүү тизмесине киргизилген.




















