Тажикстандын борборунда өткөн Борбор Азия эл аралык экономикалык форумга аймактын өлкөлөрүнөн жана Россиядан жалпысынан 500дөн ашык адам катышты.
Бул тууралуу Sputnik агенттиги жазды.
Борбор Азия эл аралык экономикалык форуму – “Евразиянын жүрөгүнө саякат” экспедициясынын жыйынтыктоочу этабы болуп саналат.
“Долбоор Россия, Казакстан, Кыргызстан, Тажикстан жана Өзбекстандан келген 100дөн ашык катышуучуларды бириктирип, аймактарды, уюмдарды, ишкерлерди, университеттерди жана жаштарды бириктирүүчү жандуу аянтча болуп калды”,- деп жазат агенттик.
Катышуучулардын ичинде бизнестин, илимдин, коомдук уюмдардын, мамлекеттик органдардын жана массалык маалымат каражаттарынын өкүлдөрү бар.
Иш-чараны Россия Федерациясынын Соода-өнөр жай палатасынын алдындагы орус-тажик ишкерлер кеңеши, Душанбе шаарынын аткаруу бийлиги, Эл аралык аймактык интеграция борбору жана Росконгресс фонду уюштурду.
Мында илимий жана билим берүү тармагындагы кызматташтык, санариптик ишкердик, суу ресурстарын башкаруу, туруктуу өнүгүү, транспорттук-логистикалык интеграция жана аймактагы соода-экономикалык байланыштарды кеңейтүү маселелери талкууланды.
Форумда бир катар уюмдардын ортосунда кызматташуу боюнча келишимдерге кол коюлуп, аймактык интеграциянын стратегиялык багыттары талкууланары күтүлүүдө.



















