Газа тилкесинде урандылардын алдында кеминде 10 миң адамдын сөөгү жатат, абал катастрофалык.
Бул тууралуу Дүйнөлүк саламаттыкты сактоо уюмунун Чыгыш Жер Ортолук деңизи боюнча аймактык директору Ханан Балхи Женевадагы брифингде билдирди.
“Биздин жериндеги командалардан келип түшкөн маалыматтарга караганда, кырдаал өтө оор, алар буга чейин мындайды көргөн эмес. Газадагы урандылардын астында жок дегенде 10 миң адамдын сөөгү жатат. 15 миң адам шашылыш медициналык эвакуацияга муктаж, 7,5 миңи эвакуацияланды”, – деди ал Женевадагы БУУнун аккредитацияланган журналисттер ассоциациясына (ACANU) маалымат берип жатып.
Израил менен палестиналык ХАМАС кыймылынын ортосундагы ок атышпоо келишими 1-мартта расмий аяктаган. 18-мартка караган түнү Израилдин Коргоо күчтөрү Газа тилкесине сокку урууну кайра баштаган. Израилдин премьер-министри Биньямин Нетаньяху чабуулдар ХАМАСтын ок атышпоону узартуу жана барымтадагыларды бошотуу боюнча АКШнын планын кабыл алуудан баш тартканы үчүн уланганын билдирди.
Газа секторунун Саламаттыкты сактоо министрлигинин статистикасына ылайык, Израил кайрадан аткылоону баштаган 18-марттан бери Газада 3700дөн ашуун киши набыт болуп, 10700дөн ашууну жарадар болду.

















