Жогорку Кеңештин депутаты Шайлообек Атазов Бишкек шаарындагы Свердлов районунун Ак-Тилек жана Красный Строитель калктуу конушунун тургундары менен жолугушту. Депутат менен бирге элдин үнүн угууга Бишкек шаарынын мэринин орун басары Жыргалбек Шамыралиев жана шаардагы мекеме-ишканалардын жетекчилери катышты. Бул тууралуу Парламенттин Коомчулук жана ЖМК менен иштөө бөлүмү билдирди.
Жолугушууда Ак-Тилек калктуу конушуна бала бакча, спорт аянтчасын куруу, иштеп жаткан мечиттин документ иштерин бүтүрүү, айрым турак жайларды газдаштыруу сыяктуу бир топ көйгөйлөр айтылды.
Тема боюнча:
Жогорку Кеңештин депутаты Шайлообек Атазов бардык маселелердин мыйзам чегинде чечилүүсүн жеке көзөмөлүнө аларын белгиледи.
Красный Строитель калктуу конушунун тургундары авариялык абалда элге кызмат көрсөткөн дарыгерлер тобунун имаратын жаңылоо, жаңы конуштарга машруттук каттамдарды уюштуруу, таза суунун тартыштыгы сындуу маселелерди айтышты. Мындан сырткары, Чоң Чүй каналынын (БЧК) жээгин тазалоо менен эс алуу жайларын уюштуруу сунуштары көтөрүлдү.
Бишкек шаарынын вице мэри Жыргалбек Шамыралиев шаарга алынып жаткан 1000 жаңы автобустун келиши менен машруттук каттам көйгөйү чечилерин айтып, башка маселелерди аткаруу пландуу негизде ишке ашып жатканын билдирди.
Депутат Шайлообек Атазов ушул аймактагы “Кыргызстандын 40 жылдыгы” эс алуу багын оңдоп түзөө боюнча маселени көтөрүп келе жатканын, Ак-Бата конушунда жаңы мектептин курулушу быйыл башталарын белгиледи. “Жолугушууда айтылган ар-бир маселелер кагазда калбай, аны тиешелүү жетекчилер аткарууга алышы зарыл. Элдин көйгөйүн чечкенге баарыбыз аракет кылышыбыз керек”,-деди депутат.
Калтуу конуш тургундары менен болгон жолугушууда муктаж үй-бүлөнүн балдарына демөөрчүлөр тарабынан даярдалган мектепке керектүү буюмдар тапшырылды.
