Белиздин бийлиги Израилдин Газадагы операциясы учурунда гуманитардык укуктарды бузгандыгы үчүн Тель-Авив менен мамилесин үзгөнүн жарыялады.
Тышкы иштер, тышкы соода жана иммиграция министрлиги дароо күчүнө кире турган төмөнкү чараларды көрдү:
- Израилдин Белизге дайындалган элчиси Эйнат Кранц-Нейгерди аккредитациялоо боюнча келишимин жокко чыгарды;
- Белиздеги Израилдин Ардактуу консулдугу тарабынан жүргүзүлүп жаткан бардык иш-чаралар жана ардактуу консулду дайындоону токтотту.
Белиз бийлиги Израиль 7-октябрдан бери эл аралык укукту, эл аралык гуманитардык укукту жана Газа элинин адам укуктарын ырааттуу түрдө бузуп келет деп эсептеди.
“Белиздин өкмөтү Газадагы Израилдин армиясынын (ЦАХАЛ) аракеттерин бир нече жолу айыптаган. Биз Израилге ок атууну токтоосуз түрдө камсыз кылуу жана Газага гуманитардык жүктөрдү тоскоолдуксуз жеткирүү чакырыгы менен кайрылдык. Биздин өтүнүчүбүзгө карабай, Израиль эл аралык гуманитардык укуктарды бузууну токтоткон жок жана гуманитардык кызматкерлердин миллиондогон газалыктардын азабын жеңилдетүүсүнө мүмкүндүк берген жок», – деп айтылат билдирүүдө.
Эске салсак, буга чейин Боливия Газа тилкесиндеги аракеттерден улам Израиль менен дипломатиялык мамилесин үзүп, Колумбия менен Чили Израилдеги элчилерин чакыртып алганы белгилүү болгон.
Боливиянын тышкы иштер министринин орун басары Фредди Мамани Израилдин Газа тилкесиндеги “агрессивдүү” аракеттеринен улам Тель-Авив менен дипломатиялык мамилени үзүүнү чечкенин билдирген.
Мындан тышкары, ноябрдын башында Йемендин “Ансар Аллах” (хуситтер) кыймылынын өкүлдөрү Израилдин буталарына бир нече ирет сокку урган. Кийинчерээк Иордания Газа тилкесиндеги Израилдин согуштук аракеттеринин кеңейишине жооп иретинде Израилдеги элчисин чакыртып алууну чечкен. Ал эми Бахрейн парламентинин өкүлдөрү өлкө Израиль менен экономикалык алакасын токтотуп, палестиналыктарды колдоорун жарыялаган.
Кийинчерээк Түркия Газадагы окуяларга байланыштуу Тель-Авивдеги элчисин Анкарага консультацияларга чакырып жатканы белгилүү болгон – мындай билдирүүнү өлкөнүн Тышкы иштер министрлиги жасаган. Андан сырткары, Түркия Гаагадагы Эл аралык кылмыш сотуна Израилдин премьер-министри Биньямин Нетаньяхуга каршы доо арыз менен кайрылган. Анкара аны Газадагы геноцидге айыптоодо.
Палестина-Израиль жаңжалы
Үстүбүздөгү жылдын 7-октябрында палестиналык ХАМАС кыймылы “Аль-Акса Топон суусу” операциясынын алкагында Израилге Газа тилкесинен болуп көрбөгөндөй масштабдуу ракеталык чабуул жасады. Андан соң кыймылдын жоокерлери Израилдин түштүгүндөгү чек ара аймактарына кирип, 200дөн ашуун адамды барымтага алышкан. Израиль бийлигинин акыркы маалыматтарына караганда, 1,2 миңге жакын адам набыт болду, алардын катарында жайт тургундар, аскерлер, чет элдик жарандар бар. Ошондой эле 5 миңден ашууну жарадар болгону кабарланган.
Буга жооп катары Израилдин Коргонуу күчтөрү Газа тилкесинде ХАМАСка каршы «Темир кылыч» операциясын баштады. Бир нече күндүн ичинде Израиль армиясы Газа менен чек арага жакын жайгашкан бардык калктуу аймактарды көзөмөлгө алып, Газага абадан сокку ура баштады. Израиль андан сырткары, Газа тилкесин толук блокадага алганын жарыялады: суу, тамак-аш, электр энергиясы, дары-дармек жана күйүүчү май менен камсыздоо токтотулду.
Октябрдын аягында Израиль Газада кургактагы операциясын баштады. Израилдин Газага жасаган соккуларынан каза болгондордун саны 11,5 миңден ашты, 29 миңден ашуун адам жараат алды.


















