3-октябрь күнү, саат 10-11:00гө чейинки аралыкта Бишкек, Ош шаарында жана облус, райондун борборлорунда 5 мүнөткө чейин сиреналар катуу жаңырып, машыгуу өтөт.
Бул тууралуу Өзгөчө кырдаалдар министрлигинин маалымат кызматы кабарлады.
Министрлик тургундарды сиренанын үнүн укканда дүрбөлөнгө түшпөөгө чакырды.
“Машыгуунун максаты — өзгөчө кырдаалдар катталган учурда жарандардын өзүн алып жүрүү, адам өмүрүн сактоо, материалдык чыгымдарды азайтуу максатын көздөйт жана “5-октябрь – Кыргыз Республикасында кырсыктардын тобокелдигин азайтуу күнүнө” карата уюштурулат”, — деп айтылат маалыматта.
Аталган иш-чарага республикабыздын бардык мамлекеттик ведомстволору, билим берүү мекемелери менчигинин түрүнө карабастан мекеме ишканалардын катышуусу мерчемделген.
Буга байланыштуу министрлик жалпыга маалымдоо каражаттарын өтө турган машыгуу тууралуу коомчулукка туура маалымат жеткирүүгө жана жарандарды так эмес маалыматтарга ишенбөөгө, дүрбөлөңгө түшпөөгө чакырды.
