Кечээ, 15-майда Дүйшөмбүдө «CASA-1000» аймактык энергетикалык долбоорун ишке ашыруу боюнча өкмөттөр аралык кеңештин кезектеги жыйыны өтүп, ага Борбор жана Түштүк Азия мамлекеттеринен, анын ичинде Кыргызстан, Пакистан жана Ооганстандан келген делегациялар, Ислам өнүктүрүү банкынын жана башка эл аралык каржы институттарынын өкүлдөрү катышты.
Бул тууралуу Тажикстандын Энергетика жана суу ресурстары министрлиги билдирди.
Жыйындын ачылышында Тажикстандын энергетика министринин орун басары Манучехр Сафарзода «CASA-1000» долбоорунун бардык катышуучу өлкөлөр үчүн стратегиялык маанисин баса белгиледи. Бул масштабдуу аймактык долбоор Борбордук жана Түштүк Азия мамлекеттеринин энергетика системасын өнүктүрүүгө гана салым кошпостон, аймактагы экономикалык жана саясий кызматташтыкты чыңдоо үчүн маанилүү аянтча катары да кызмат кылат.
Министрликтин берген маалыматына караганда, жыйынды ооган делегациясын «Breshnaа» мамлекеттик энергетикалык компаниясынын жетекчиси Абдулбори Умар жетектеди.
«CASA-1000» – Тажикстан менен Кыргызстандан ашыкча электр энергиясын Ооганстан менен Пакистанга экспорттоого багытталган аймактагы ири энергетикалык долбоорлордун бири.
Жалпы баасы 1,1 миллиард АКШ долларынан ашкан долбоор Дүйнөлүк банктын жана башка эл аралык өнөктөштөрдүн колдоосу менен ишке ашырылууда. Демилге 1387 километр электр өткөргүч линияларын жана эки конвертердик көмөкчордондорду курууну камтыйт. Транзиттик линиянын жалпы узундугу 750 км, Ооганстандын аймагы аркылуу өтүп, Пакистанга чейин жетет.
Тажикстандын Энергетика министрлиги белгилегендей, Тажикстан менен Кыргызстандын аймагындагы бардык курулуш жана техникалык иштер буга чейин бүткөрүлгөн. Ал эми Пакистанда долбоорду ушул жылдын аягына чейин бүтүрүү пландалууда.
Долбоор 2021-жылы Ооганстанда бийлик алмашкандан кийин убактылуу токтотулган, бирок 2024-жылы Талибан өкмөтү эл аралык деңгээлде таанылбаганына карабастан, «CASA-1000» программасын ишке ашырууну улантуу боюнча келишимге кол койгон.
Долбоордун бир бөлүгүн бүтүрүү үчүн Ооганстан Дүйнөлүк банктан кошумча 100 миллион АКШ долларын каржылайт деп күтүлүүдө.
«16-майдагы жыйындын жүрүшүндө кеңештин мүчөлөрү өлкөнүн негизги энергетикалык объектилери – Сангтуда районундагы 1300 МВт конвертердик көмөкчордон, ошондой эле Нурек ГЭСи менен таанышат»,- деп айтылат маалыматта.



















