Учурда 16 миллиондон ашык сириялык же ар бир он адамдын жетөөсү гуманитардык жардамга муктаж жана алардын көбү аялдар менен балдар экендигин Бириккен Улуттар Уюмунун Сирия боюнча аймактык гуманитардык координаторунун орун басары Дэвид Карден билдирди.
Бул тууралуу Карден дүйшөмбү күнү Дамасктан видеобайланыш аркылуу журналисттерге сүйлөп жатып билдиргенин уюмдун басма сөз кызматы билдирди.
“Азыр Сирияга инвестиция салууга убакыт келди, анткени өлкө өткөөл мезгилдин оор баскычында турат”,- деди ал.
Кардендин айтымында, сириялыктарга “татыктуу келечектин пайдубалын түптөөгө” жардам берүү жана качкындардын жана ички жер которгондордун аман-эсен кайтып келишине колдоо көрсөтүү зарыл.
Аймактык координатордун орун басары Сириянын көп жерлеринде жаңжал иш жүзүндө токтоп калганын, бирок гуманитардык кризис дагы эле бүтө электигин белгиледи.
Анын айтымында, учурда 16 миллиондон ашык сириялыктар гуманитардык жардамга муктаж. Алардын көпчүлүгү аялдар менен балдар.
“Адамдар акырындык менен үйлөрүнө кайтып жатышат, бирок Сирия дүйнөдөгү эң ири жер которгон кризистердин бири бойдон калууда”,- деп кошумчалады ал.
Дэвид Карден БУУ жана анын өнөктөштөрү каражаттын кескин жетишсиздигине карабай колунан келгендин баарын жасап жатканын баса белгиледи.
Бүгүнкү күндө гуманитардык коомчулук донорлордон 179 миллион доллар алды, бул ушул жылдын июнь айынын аягына чейин калктын аялуу катмарына жардам берүү үчүн зарыл болгон 2 миллиард доллардын тогуз пайызына жетпейт.
“Биз гуманитардык жардамдын фазасы мүмкүн болушунча кыска болот жана калыбына келтирүү жана реконструкциялоо багытында ишенимдүү кадам таштай алабыз деп чын жүрөктөн үмүттөнөбүз”, – деди Дэвид Карден.















