Кытайдын төрагасы Си Цзиньпин, Индиянын премьер-министри Нарендра Моди жана Түштүк Африканын президенти Сирил Рамафоса, ошондой эле Бразилиянын Тышкы иштер министри Мауро Виейр БРИКС саммитине катышуу үчүн Казанга келишти.
Казандагы сүйлөшүүлөр Орусия менен Кытайдын мамлекет башчыларынын быйылкы үчүнчү жеке жолугушуусу болмокчу. Май айында Путин Кытайга мамлекеттик сапар менен барса, июлда Си Цзиньпин менен Астанадагы ШКУ саммитинин алкагында жолуккан.
Индиянын премьер-министри Нарендра Модинин бул акыркы төрт ай ичиндеги экинчи сапары. Буга чейин Индиянын премьер-министри Казанга келген болчу. Бүгүн башталгыч саммиттин алкагында ал Орусиянын президенти Владимир Путин менен сүйлөшүүлөрдү өткөрмөкчү.
Моди Орусияга быйыл экинчи жолу келди. Путин менен Индиянын премьер-министри жайында Москвада жолугушкан. Ал сапар Моди үчүн жалпы парламенттик шайлоодон кийин бул кызматка кайра дайындалгандан кийинки биринчи чет элдик сапары жана акыркы беш жылда Россияга болгон биринчи сапары болгон.
Казанга келген Түштүк Африканын президенти Сирил Рамафосаны аэропорттон Татарстандын башчысы Рустам Минниханов тосуп алды.
Рамафоса бүгүн Путин менен сүйлөшүүлөрдү өткөрмөкчү.
Былтыр Түштүк Африканын президенти Орусияга эки жолу – “Африка тынчтык демилгесинин” лидерлер тобунун курамында жана Санкт-Петербургда өткөн экинчи Орусия-Африка саммитине келсе, быйыл Путин менен Рамафоса телефон аркылуу эки жолу сүйлөшкөн.
Жаракат алган Бразилиянын президенти Луис Инасиу Лула да Силванын ордуна саммитке катышууга Тышкы иштер министри Мауро Виейра келди.

Да Силва БРИКСтин саммитине катышуусу пландалган, бирок ал келе албай калды. Анткени дарыгерлер ага узак сапарга чыкпоого кеңеш беришкенин анын кеңсеси мурдараак билдирген. Ал резиденцияда кулап, башынан жаракат алган.
Белгилей кетсек, бүгүн Казанда БРИКСтин XVI саммити ачылууда. Үч күнгө созула турган иш-чарага бул эл аралык бирикмеге катышуучу өлкөлөрдүн мамлекет башчылары гана эмес, башка көптөгөн белгилүү саясатчылар да катышат. Анда маанилүү сүйлөшүүлөр жүргүзүлүп, тарыхый келишимдер түзүлөөрү пландалууда.
Россия 2024-жылы БРИКСке төрагалык кылып жаткандыктан саммитти өткөрүүдө. Россиянын БРИКСке төрагалыгы адилеттүү глобалдык өнүгүү жана коопсуздук үчүн көп тараптуулукту бекемдөө урааны алдында өтүп жатат.
БРИКС тобу 2006-жылы Бразилия, Россия, Индия жана Кытай тарабынан түзүлүп, 2011-жылы ага Түштүк Африка кошулган. 2024-жылдын 1-январында Египет, Иран, БАЭ, Сауд Аравия жана Эфиопия топтун толук кандуу мүчөсү болушкан.
Казанда өтө турган БРИКСтин саммитине 33 мамлекет, анын ичинде 24ү мамлекет лидерлери катышарын тастыктаганы буга чейин Татарстандын вице-премьер-министри, республиканын Министрлер кабинетинин аппарат жетекчиси Шамил Гафаров билдирген.



















