Астанада Борбордук Азия өлкөлөрү үчүн бирдиктүү телеканал жана аймактык медиа платформа түзүү идеясы каралды, деп билдирет Казакстандын Маданият жана маалымат министрлигинин басма сөз кызматы.
Консультативдик жолугушууга Өзбекстандын Маалымат жана массалык коммуникациялар агенттигинин директорунун биринчи орун басары Дилшод Саиджанов, Казакстандын Маданият жана маалымат министринин орун басары Канат Искаков, Тажикстандын Телекөрсөтүү жана радиоуктуруу боюнча мамлекеттик комитетинин төрагасы Нуриддин Саид, Түркмөнстандын телекөрсөтүү, радио жана кинематография боюнча мамлекеттик комитетинин төрагасы Аннасахет Какаев жана Кыргызстандын Маданият, маалымат, спорт жана жаштар саясаты министрлигинин эл аралык байланыштар жана инвестиция тартуу бөлүмүнүн башчысы Нусубалы Жакыпбековдор катышты.

«Тараптар Борбордук Азиянын телеканалын жана аймактык медиа платформасын түзүү мүмкүнчүлүгүн карап чыгууга макулдашышты», — деп айтылат маалыматта.
Мындан тышкары жыйындын жүрүшүндө ЖМК маселелери боюнча ыйгарым укуктуу органдардын ортосунда медиа сабаттуулукту жогорулатуу жана фейк маалымат менен күрөшүү боюнча чаралар талкууланды.
Сүрөт: Казакстан Республикасынын Маданият жана маалымат министрлиги.


















