“Кыргызтелекомдун” курант орнотулган имараты 1,56 миллиард сомго бааланып, “Айыл банкка” сатылары белгилүү болду. Бул тууралуу аталган мекемеден билдиришкенин Sputnik маалымат каражаты жазды.
Маалыматта айтылгандай, “Кыргызтелекомдун” аталган мекемесинин имаратын тейлөөгө 20 миллион сом коротулат. Ошол эле учурда анын теңинен көп бөлүгү пайдаланылбай турат.
Курант орнотулган имарат тарыхый эстелик болгондуктан, аны жаңылоого чоң каражат талап кылынат. Себеби имараттын жайгашкан жери борбордук аймакта болгондуктан, Бишкек шаарынын визиттик карточкасы катары саналат. Аны тейлөөгө, жаңылоого компаниянын каржылык мүмкүнчүлүгү жетпейт.
Акыркы жылдары имараттын айланасын жакшыртуу боюнча бир катар иштер жасалганы менен толук кандуу жаңылоого каражат жетиштүү болгон эмес экендиги айтылат маалыматта.
Көз карандысыз компания имараттын наркын 1,56 миллиард сомго баалаган жана “Айыл банкка” сатыларын билдирген.
Ошондой эле бул имарат мамлекеттик менчикте калат.
Маалымат: Бишкектин так ортосундагы коңгуроолуу мунара – Абдрахманов проспектиси менен Чүй проспектисинин кесилишинен орун алган.
Өлкөнүн негизги сааты 1984-жылы курулган. Анын механизми Арменияда жасалып, элдердин достугунун символу катары ошол кездеги Кыргыз ССРине тартууланган.
СССР убагында бул мунарадагы сааттын коңгүроосунун үнү Москвадагы Кремлдин коңгуроолоруна дал келген.
Бирок СССР тарагандан бир нече айдан кийин үнү жазылган тасма жараксыз болуп, сааттын үнү чыкпай калган.
2016-жылы кайра кыргызча иштелип, эртең мененки саат 8ден кечки 9га чейин саат сайын мунарадан темир комуздун үнү жаңырып турат.



















