Борбор калаада коомдук транспортто көптөн бери чөнтөк уурулугу менен алектенген деп үч киши кармалды.
Бул тууралуу Бишкек ШИИБ билдирди.
Милициянын маалыматына караганда, тартип сакчыларына Т.Н аттуу жаран кайрылып, 11-сентябрь күнү “Кудайберген” базары жакта маршруткада белгисиз адамдар 43 миң сом салынган капчыгын уурдап кеткенин айтып, аларга чара көрүп берүүнү суранган.
Бул факт боюнча Кылмыш-жаза кодексинин “Уурулук” беренеси боюнча иш козголгон.
Ыкчам аракеттердин натыйжасында 1995-жылы туулган М.А., мурда ушул сыяктуу кылмыштарды жасагандыгы үчүн бир нече жолу соттолгон 1994-жылы туулган Б.Т., 2009-жылы туулган. А.Б.аттуу жарандар кармалып, убактылуу кармоо жайына киргизилди. Ал эми жашы жете элек 2009-жылы туулган А.Б. жаран, Үй-бүлөнү жана балдарды колдоо бөлүмдөрүнүн кызматкерлерине өткөрүлгөн.
Тергөө учурунда шектүүлөр атайы түзүлгөн схема менен иштегени ачыкталды. Алар “Lexus IS 200” үлгүсүндөгү автоунаасы менен маршруткалардын артынан жүрүп отуруп, бир аздан соң жүргүнчү катары ага түшүп, андан соң уурулук кылып жүрүшкөн.
Тинтүү учурунда алардын унаасынан 18 уюлдук телефон, 19 миң 400 сом, үч бычак, үч паспорт, банк карталары, соода маркеттеринин карталары, сим-карталар, мини флеш-карталар, пневматикалык тапанчанын желим октору табылган.
Шектүүлөрүдүн башка кылмыштарга да тиешелүүлүгү тастыкталды. Учурда тергөө уланууда.
Милиция чөнтөкчүлөрдөн жабыркагандар болсо 0(706) 102-102 и 0(707) 75-75-51 же 102 телефондору аркылуу байланышууга чакырды.
