Борбор калаанын жетекчилиги учурда транспорт тыгынын метробус салуу менен чечүүнү пландаштырып жатат. Транспорттун бул түрү Бишкектин Киев көчөсүнө салынмакчы.
Бул тууралуу шаар мэри Айбек Жунушалиев 21-январда Жогорку Кеңештин Транспорт, коммуникациялар, архитектура жана курулуш боюнча комитетинин отурумунда билдирди.
Жыйындын жүрүшүндө А. Жунушалиев мэрия бул тажрыйбаны изилдеп чыкканын жана бул жакшы натыйжа берерине ишене тургандыгын айтты.
«Биз 5 миллион доллар гранттын эсебинен Киев көчөсүнө метробусту ишке ашырылышын пландап жатабыз. Биз уюштуруп, долбоордун кандай ишке ашырылып жатканын көрө алабыз. Атайын белгиленген линиялар болот, биз аларга кайрылып келебиз. Бүгүнкү күндө ал жол куруу жана оңдоо иштерине байланыштуу убактылуу токтотулду. Анткени жаңы жолдордогу иштердин айынан маселе пайда болушу мүмкүн», – деди калаа башчысы.
Ал эми Жогорку Кеңештин депутаты Медербек Саккараев автобустар башка транспортко тийип калбашы үчүн метро сыяктуу график менен жүрсө туура болорун белгиледи. Ал өз сөзүндө «Эгерде 20 мүнөттө эл жетүүчү шарттар түзүлсө, алар коомдук транспортко өтүшөт», – деп кошумчалады.
Буга чейин Бишкектин айрым жерлеринде сары тилке менен менен жүрүүгө уруксат берилери айтылып, бир катар көчөлөрдө автобус линияларынын тизмеси жарыяланган.
Ошол убакта сары тилке Түштүк магистралдын Жетикашкаева көчөсүнөн Байтик баатырга чейинки жерине чийилген.
Метробус – автобустук (же троллейбустук) тейлөөнү уюштуруунун ыкмасы. Ал кадимки автобустук каттамдарга салыштырмалуу жогорку эксплуатациялык мүнөздөмөлөрү, башкача айтканда ылдамдык, ишенимдүүлүк, жүк көтөрүмдүүлүк менен айырмаланат.
Эске сала кетсек, борбор калаага жогорку ылдамдыктагы метробустарды киргизүү планы 2018-жылы Бишкек шаарында өткөн “Борбордогу коомдук транспорттун иши” аттуу тегерек столдун жүрүшүндө айтылган. Бул жыйынга ал учурдагы калаанын мэриясынын өкүлдөрү да катышкан.
Ошол мезгилдеги маалыматта метробуска жүргүнчүлөрдү отургузуу жана түшүрүү аялдамаларда эмес, атайын терминалдар аркылуу ишке ашары жөнүндө сөз болгон.



















