World Air Quality уюмунун иликтөөсүнүн 24-декабрдагы жыйынтыгы боюнча Бишкек абанын булганышы боюнча дүйнөдө биринчи орунга чыкты.
Уюмдун абанын сапаты тууралуу индексинде Бишкектин борборундагы көрсөткүч (AQI) саат 19.00гө карата 458ди көрсөттү. Калаанын башка бөлүктөрүндө индекс кечээ өтө кооптуу чектен – 600-760тан ашып кетти.
Ушул эле сайттын берген баасына ылайык, ден соолук үчүн кооптуу деп табылды.
Ыш маселеси Жогорку Кеңеште да көтөрүлүп, бул көйгөй былтыр да талкууланып, тиешелүү чечимдер кабыл алынганы менен жылыш болбой жатканы айтылды.
Депутат Элдар Абакиров көмүрлөрдүн сапаты боюнча иш алып барууну сунуштап, “-Бишкектин тегерегиндеги айылдарда дем алуу кыйын болуп калды. Бул көмүрдүн сапатынан болушу мүмкүн деген ой келди. Кара-Кеченин көмүрүнүн ордуна бир жыл бою бышкан көмүрдү колдонуп көрүүнү сунуштайм”,- деди.
Ал ыштан арылуунун жолун издеп, болбосо бул миллион-миллион доллар зыян катары элибиздин ден соолугуна тийип жатат деген оюн ортого салды.
Бирок Өзгөчө кырдаалдар министрлигинин өкүлү ыш жылдан-жылга азайып жатканын билдирди. Министрликтин атайынын өкүлүнүн бул бирдирүүсүнөн кийин бишкектиктер реакция кылышып, интернет баракчалары аркылуу ар кандай билдирүүлөрдү калтырышууда.
Ал эми Жогоркук Кеңештин депутаты Исхак Масалиев да өзүнүн Фейсбук баракчасына:
“Бираз басып келемин деп сыртка чыктым. Беш минутага жетпей кайра чуркап келдим. Ыш укмуш, аба жетишпейт, кийимдер кадимкидей түтүн жыттанып калды.
Интернетте жанылык, – Бишкек дүйнөдө биринчи орунга чыгып кетти, – абанын уулугу боюнча…
Бирөөнү урушканы кажети жок, керек болсо борборубузга өзгөчө абал киргизип, тез арада керектүү иштерди жүргүзөлү…
Биринчиден, жер үйлөрдүн баарыны газ менен жылытканга өткөрсөк… Тургундарга керек болсо акчалай жардам берип…”,- деп пост жазган.
Чындыгында Бишкектин үстүн каптаган ыштан улам Борбордук Ала-Тоо аянтындагы 100 метр болгон жаңы флагштоктун туусу да ыштан улам өңү өзгөрүп араң көрүнгөн абалга жеткен. Мына ушундай көрүнүштөн кийин Өзгөчө кырдаалдар министринин өкүлүнүн ыш жылдан-жылга азайып жатат деген билдирүүсү таң калыштуу болду.
Эскерте кетсек, былтыркы 2023-жылдын жыйынтыгы менен Бишкек абасы эң кир шаарлардын ондугуна кирип, дүйнөлүк абанын сапаты боюнча дүйнөдөгү ири шаарлардын рейтингинде борбор калаа онунчу орунда турган.
Тизменин сап башында Индиянын борбору Дели шаары турса, андан кийин Пакистандын Лахор шаары орун алган.
Белгилүү болгондой, соңку жылдары Бишкек абасы кир шаарлардын тизмесинен алдыңкы орундарды эч кимге бербей келет.
Абанын сапаты индекси (AQI) ден-соолукка коркунучтун жогорулашын көрсөткөн алты категорияга бөлүнөт. 300дөн жогору AQI көрсөткүчү болсо, абанын кооптуу сапатын, ал эми 50дөн төмөн болсо абанын сапаты жакшы экендигин билдирет.



















