БАЭ Эл-Фуджайра менен Индиянын Мумбай шаарын суу алдынан байланыштыра турган темир жол курууга ниеттенүүдө. Бул тууралуу «Unilad» МА жазды.
Амбициялуу долбоордун курулушу тууралуу сөз алгач 2018-жылы айтылган. Анда суу астындагы жол Араб деңизинин жээги менен өтөөрү белгилүү болгон. Жолдун узундугу 1200 миль же 1900 чакырымдан бир аз ашык болот.

Жолдо ылдам жүрүүчү поезддер ишке киргизилет, жүрүү убактысы 2 саатты түзөт. Бул учак менен баргандан караганда бир саатка тезирээк болот. Анын жүргүнчүлөрү эки өлкөнүн жарандары, туристтер жана жумушчулар боло алышат. Жол аркылуу жүк ташуучу поезддер да жүрө алат.
Темир жолдордун курулушун БАЭнин Улуттук консультациялык бюросу жүргүзөт. Бюро жакында инженерлер долбоорлоо иштерин баштаганын билдирди. Азырынча жолдун аталышы жок.
Долбоор баштапкы этапта болгондуктан, так маалыматтар жок. Темир жол туннелдин астына болот деп күтүлүүдө. Туннелдин айрым участоктору айнек болот – жүргүнчүлөр саякат учурунда суу астындагы көрүнүштөрдү көрө алышат.

Адистердин баамында курулуштун алгачкы этабында эле 1 миллиард доллардан ашык каражат талап кылынат. Бүтүндөй долбоорго канча каражат жана убакыт кетерин айтуу кыйын. Бирок инженерлер суу астындагы жолдун курулушуна кеминде 7, ал тургай 10 жыл убакыт кетет деген ойлору менен бөлүшүүдө.
Келечекте суу алдындагы темир жол курулуп калса БАЭ дагы бир визиттик картага ээ болот.















