Бүгүн, 18-сентябрда, Ош облусунун Кара-Суу районундагы толук реконструкциядан өткөн “Манас” стадионунун ачылыш аземи өтүп, ага улай, 2025-жылдагы КР Кубогунун финалында «Мурас Юнайтед» менен «Дордой» клубдары беттешет. Бул тууралуу Кыргыз футбол биримдигинен билдиришти.
Стадиондун ачылыш аземи 18:00дө башталып, шоу-программа менен коштолот. Ал эми финалдык оюн саат 19:30да старт алат.
Стадионго кире албай калган күйөрмандар үчүн Кара-Суу шаарынын борбордук аянтында атайын фан-зона уюштурулуп, чоң экранда түз эфир көрсөтүлө турган болууда.
Кыргызстанда акыркы жылдары футболго көңүл буруу күчөдү. Аймактарда эскирип калган стадиондор жаңыланып, кайрадан пайдаланууга берилүүдө.
Мисалы, өткөн айда Өзгөн районундагы, эки күн башта Токтогул районундагы стадион толук оңдолуп ачылды. Ал эми бүгүн, 16-сентябрда, Кара-Суу районунун «Манас» стадиону пайдаланууга берилмекчи. Мындан тышкары, акыркы жылдары Нарын, Базар-Коргон, Кочкор-Ата сыяктуу аймактарда да стадиондор жаңыртылып, жаштарга футбол менен машыгууга шарт түзүлдү.
Кыргызстандын футболчулары акыркы жылдары эл аралык мелдештерде да жакшы натыйжаларга жетишүүдө. Улуттук курама Азия кубогуна мөөнөтүнөн мурда жолдомо алып, алгач ирет Дүйнө чемпионатынын тандоо турунун үчүнчү этабына чейин жетти. Ал эми U-23 курама командасы тарыхта биринчи жолу Азия чемпионатына жолдомо алып, кыргыз футболунун өнүгүп жатканынан кабар берди.

















