Кытайда бүгүн эртең менен саат 06:10до күчү 5,5 баллга жеткен жер титирөө катталды.
КР Улуттук илимдер академиясынын Сейсмология институтунан билдиришкендей, жер титирөө Кыргызстанда дагы сезилген. Кырсыктын очогу Кытайдын аймагында — Ысык-Көлдөгү Бедел айылынан түштүк-чыгышка карай 25 км, Кумтөр кенинен түштүк-чыгышка карай 72 км, Каракол шаарынан түштүк-чыгышка карай 125 км аралыкта жайгашкан.
Жер титирөөнүн күчү Кыргызстандын калктуу конуштары – Бедел айылында 4 баллга, Кумтөрдө 3 баллга чейин сезилген.
Мындан тышкары, сейсмологдордун маалыматына караганда, саат 06:06да Кыргызстанда дагы бир жер титирөө катталган. Анын очогу Кыргызстандын аймагында — Жалал-Абад облусунун Таран-Базар айылынан түндүк-батышка карай 3 км, Жоон-Күңгөй айылынан түштүк-батышка карай 3 км, Кара-Чолок айылынан түндүк-чыгышка карай 5 км, Көк-Жаңгак шаарынан түндүк-чыгышка карай 16 км жана Жалал-Абад шаарынан түндүк-чыгышка карай 36 км аралыкта жайгашкан.
Жер титирөө калктуу пункттарда 2,5 баллга чейин сезилген.
Белгилей кетүүчү жагдай, 4-март күнү да саат 12:22 чамасында Кыргызстандын Чүй облусунда жана Бишкек шаарында жер титиреген.
Сейсмология институтунун маалыматына караганда, силкинүүнүн күчү очогунда 6 баллга жакын көрсөткүчтү түзгөн.
Чолпон-Ата шаарында, Бостери, Ананьево айылдарында, Казакстандын Алматы шаарында 4,5 балл, Балыкчы шаарында 4 балл, Бишкекте, Караколдо, Кумтөр кенинде жана Кажы-Сайда 3,5 балл сезилген.
Силкинүүнүн очогу Казакстандын Алматы шаарынан 37 чакырым, Бишкектен 190 чакырым аралыкта, кыргыз-казак чек арасында Кыргызстандын аймагында болгон.
Жер титирөө Кыргызстанда, Казакстанда жана Кытайда сезилген.



















