Бүгүн 26-мартта Кыргызстандын футбол боюнча улуттук курама командасы кытайлык Тайбэйдин футболчуларын кабыл алат. Оюн Бишкек шаарындагы Д.Өмүрзаков атындагы борбордук стадиондо өтөт.
Маалым болгондой, бул беттештер 2026-жылы боло турган Дүйнө Чемпионатка тандоо раундунун турнири алкагында өтүп жатат.
Бул оюнда «Ак шумкарлар» ак түстөгү футболдук форма менен жашыл майсаңга чыгат.

Буга чейин башкы машыктыруучу Штефан Таркович бул оюнга даярдыктар эң жакшы шарттарда болбогонун белгиледи. Анткени Тайбэйден Бишкекке учуу узакка созулуп кеткен. Ошондуктан оптималдуу форманы сактап, машыгууну улантуу үчүн Дубайда 20 саат токтоп туруу чечими кабыл алынган.
«Эки оюн катары менен жеңишке жетүү оңой эмес, бирок биздин максатыбыз – дүйнөлүк чемпионатка тандоонун кийинки баскычына жолдомо алуу жана биз жеңиш үчүн күрөшүүгө даярбыз»,-деген Таркович.
Улуттук курама команданын курамы
Эсиңизде болсо, ушул жылдын 21-март күнү «Ак шумкарлар» конокто кытайлык Тайбейдин курамасы менен беттешип, 2:0 эсебинде утуп алган. Анын жыйынтыгы менен (үчүнчү айлампада) өз тайпасында 2-орунду камсыздап турат. Ал эми өз дарбазасына аз гол өткөргөн курама катары Оман биринчи орунду камсыздап турат. Алар бир гана гол өткөрүп алышкан, аны биздин курамадагы жарым коргоочу Одилжан Абдурахманов тээп киргизген.
Ошентип учурда Кыргызстан, Оман жана Малайзияда 6дан упай болсо, Тайбейде упай жок.




















