26-августта Ошто мугалимдердин салттуу “Август кеңешмеси” өттү. Бул иш-чара аймактагы мугалимдердин жана жалпы эле билим берүү кызматкерлеринин жаңы окуу жылына даярдыгын талкуулоо максатында уюштурулду.
Кеңешмеде заманбап билим берүү системасындагы жаңылыктар, реформалар, ошондой эле мектеп программаларынын сапатын жогорулатуу маселелери каралды.
Ошондой эле анда 2023-2024-окуу жылындагы жетишкендиктер менен кемчиликтер талданып, 2024-2025-жаңы окуу жылына карата даярдыктар, тапшырмалар жана милдеттер талкууланды.
Алгач Билим берүү жана илим министри Догдуркүл Кендирбаева “Алтын Казык” программасы боюнча атайын презентация жасап, президенттин тапшырмасы менен Кыргызстан 12 жылдык окуу системасына өтүп жатканын билдирди.
“Президент Садыр Нургожоевич 2023-жылдын сентябрь айында БУУда сөз сүйлөп, Кыргызстан билим берүү менен туруктуу өнүгөт деп айткан эле. Мына азыр, президенттин тапшырмасы менен 12 жылдык окуу системасына өтүп жатабыз. Алдыбызда абдан көп чакырыктар турат. Биринчи жолу өлкөдө онлайн мектептер ачылды. Сырттан окуу тууралуу мектептер бар. Аларга 300 млн сом коротуп атабыз. 5 миңдей окуучу сырттан окутуучу мектептерде окуйт. Биз кимди алдап атабыз. Бала физикалык жактан мектепте отуруш керек. Эми ал сырттан окуткан мектептерди чакыртып алабыз дагы, онлайн мектептерди ачабыз”,-деди Кендирбаева.
Министр жаңы жылга чейин өлкөдөгү мектеп мугалимдерине компьютер, ноутбук бериле турганын айтты.
“Биз ар бир мугалимге бирден компьютер беребиз. Анда мугалимдин квалификациясын жогорулатуу боюнча бирдиктүү программалар болот. Ал үчүн Америкага барып, ал программа менен кол коюп келгенбиз. Анан калса жасалма интеллект – Google аналитика менен иштейбиз”,-деп кошумчалады ал.
Кеңешмеге президенттин Ош облусундагы ыйгарым укуктуу өкүлү Эльчибек Джантаев баш болгон жетекчилер, ЮНИСЕФ, МЕРСИКО эл аралык фонддорунун өкүлдөрү, райондук мамлекеттик админстрациянын башчылары-акимдер, КР эмгек сиңирген мугалимдери, ЖОЖдордун ректорлору, Ош билим берүү институтунун кызматкерлери, массалык маалымат каражаттарынын өкүлдөрү жана жалпы эле облустагы билим берүү кызматкерлери катышты.
Президенттин Ош облусундагы ыйгарым укуктуу өкүлү Эльчибек Джантаев куттуктоо сөз сүйлөп, облустагы предмет боюнча жылдын мыкты мугалимдерине, жылдын мыкты тарбиячыларына, жылдын мыкты билим берүү мекемелерине, эмгек сиңирген ардагерлерге баалуу белектерди жана акчалай сыйлыктарды тапшырды.
Ошондой эле мугалимдерге колдоо көрсөтүү максатында Араван районунан 4, Кара-Суу районуна 6 билим берүү кызматкерине турак жай үчүн жер тилкесине сертификат тапшырды.
Ал эми Казакстандагы “Назарбаев” университетинин профессору Дүйшөнкул Шаматовдун, Кара-Кулжа районундагы автордук мектептин негиздөөчүсү, КР эмгек сиңирген мугалими Орозали Сайдилкановдун катышуусунда “Билим берүүгө 100 жыл: трансформация чакырыктар жана жаңы горизонттор” аттуу панелдик талкуу өткөрүлдү.
Кеңешменин алкагында жаш мугалимдер менен окуучулардын робото-техника боюнча көргөзмөсү коюлуп, кол өнөрчүлөрдүн эмгектери көрсөтүлдү. Ошондой эле бардык райондордун билим берүү бөлүмдөрүнүн атайын презентациялары, басма үйлөрдүн чыгарган китептеринин көргөзмөлөрү коюлду.






















