Бүгүн, 4-августта Ашхабадда Түркмөнстандын президенти Сердар Бердымухамедов, Тажикстандын президенти Эмомали Рахмон жана Өзбекстандын президенти Шавкат Мирзиёевдин үч тараптуу жолугушуусу болот.
Бул тууралуу “Нейтральный Туркменистан” расмий гезити билдирди.
Басылма саммиттин программасын тактаган эмес.
Түркмөнстандын экономисттер союзунун төрагасы Юрий Аронскийдин айтымында, жолугушууда үч мамлекеттин ортосундагы экономикалык алакаларды өнүктүрүү, саламаттыкты сактоо, айыл чарба, билим берүү жана илим тармагындагы кызматташуу маселелери каралышы мүмкүн.
«Ошондой эле транспорт коридорлорун, биринчи кезекте темир жолдорду мындан ары өнүктүрүү жана өлкөлөр ортосундагы соода жол-жоболорун жеңилдетүү маселелерин, атап айтканда, контейнердик ташуулардын өткөрүү жөндөмдүүлүгүн жана көлөмүн жогорулатуу, жүктөрдү ташуу жана сактоо үчүн биргелешкен терминалдарды түзүү маселелерин кароо актуалдуу болот», — деп билдирди ал ТАССтын кабарчысына.
Ашхабадга алгачкылардан болуп келген Шавкат Мирзиёев түркмөн элинин улуттук лидери, Түркмөнстандын Элдик Маслахатынын төрагасы Гурбангулы Бердымухамедов Ашхабад эл аралык аэропортунан өзү тосуп алды.
Сүйлөшүүлөрдүн жүрүшүндө тараптар эки тараптуу күн тартибиндеги актуалдуу маселелерди карашты.
«Өзбек-түркмөн көп кырдуу мамилелеринин динамикалуу өнүгүшү жана эки өлкөнүн ортосундагы стратегиялык өнөктөштүк ырааттуу тереңдеп баратканы канааттануу менен белгиленди. Соода, өнөр жай, энергетика, айыл жана суу чарба, транспорт жана башка артыкчылыктуу багыттар боюнча практикалык кызматташууну кеңейтүү белгиленди», — деп айтылат маалыматта.
Өзбекстан менен Түркмөнстандын лидерлери ошондой эле аймактык кызматташтык боюнча пикир алмашып, алдыдагы иш-чаралардын графигин карашты.
Мындан тышкары, Мирзиёев Түркмөнстандын президенти Сердар Бердымухамедов менен да жолугушту.
Ал эми Ашхабадга конгон Тажикстандын президентин Эмомали Рахмонду эл аралык аэропорттон Түркмөнстандын мурдагы башчысы Гурбангулы Бердымухамедов ардактуу кароол менен тосуп алганын түркмөн маалымат каражаттары жазып чыгышты.
Маалыматка караганда, Бердымухамедов менен Рахмондун жолугушуусунун жүрүшүндө тараптар эки республиканын социалдык-экономикалык өнүгүүсүнүн артыкчылыктарын эске алуу менен түркмөн-тажик мамилелеринин азыркы абалын жана мындан аркы өнүгүү мүмкүнчүлүктөрүн талкуулашты.
Андан соң Рахмон Түркмөнстандын президенти Сердар Бердымухамедов менен Ашхабаддагы «Аркадаг» мейманканасында сүйлөшүүлөрдү өткөрдү.
Эки тараптуу өз ара пайдалуу кызматташтыкты кеңейтүү боюнча пикир алмашуудан кийин тараптар эки тарапты кызыктырган эл аралык жана аймактык саясаттын бир катар маселелерин карашты.
Дос эки мамлекеттин башчылары алдыда боло турган саммит аймактык өнөктөштүктү өнүктүрүүгө салым кошоруна ишеним билдиришкенин Түркмөнстандын мамлекеттик маалымат агенттиги билдирди.
