Араб Лигасы Египеттин Газа тилкесин калыбына келтирүү боюнча 53 миллиард долларлык планын колдоду. Бул тууралуу Египеттин президенти Абдел Фаттах ас-Сиси уюмдун Каирдеги саммитинин соңунда билдирди.
Араб лидерлери эл аралык коомчулукту жана каржы уюмдарын Газа тилкесине жардам берүүгө чакырды. Баштапкы алты айлык калыбына келтирүү фазасы таштандыларды тазалоого жана убактылуу турак жайларды орнотууга багытталган, анын баасы болжол менен 3 миллиард долларды түзөт.
Планга ылайык, Газа тилкесинде эки жылдын ичинде биринчи этапта 200 миң турак жай, экинчи этапта да ушунча турак жай курулат.
Тактап айтканда, 2030-жылга чейин 3 миллионго чейин адамды батыра ала турган жүз миңдеген жаңы үйлөрдү, ошондой эле аэропортту, өнөр жай зоналарын, мейманканаларды жана парктарды куруу пландаштырылууда.
Бул план АКШнын президенти Дональд Трамптын палестиналыктарды өз аймагынан сүрүп чыгаруу жана Газага көзөмөл орнотуу пландарына каршы турууга багытталган.
Бул чечимге АКШ менен Израилдин бийликтери буга чейин эле жооп кайтарып, араб өлкөлөрүнүн сунушу кырдаалдын реалдуулугун эске албаганын билдиришкен.



















