Amnesty International эл аралык уюму согуш кылмыштары жана адамзатка каршы кылмыштар боюнча айыпталып, Эл аралык кылмыш соту тарабынан издөөгө алынган Израилдин премьер-министри Биньямин Нетаньяхунун АКШ тарабынан кабыл алынуусун айыптады.
Бул тууралуу Amnesty International уюмунун Х соцтармактагы баракчасында айтылат.
«Эл аралык кылмыш соту тарабынан издөөдө жүргөн Нетаньяхуну тосуп алуу менен АКШ эл аралык адилеттүүлүктү тоготпогондугун көрсөтүүдө», – деп айтылат аталган уюмдун билдирүүсүндө.
“Байдендин администрациясы Палестинага адилеттүүлүк орнотуу боюнча бардык эл аралык аракеттерди четке каккан, эми Трамп Нетаньяхуну камакка алуу же ага карата тергөө жүргүзүүнүн ордуна президенттик кызматка киришкенден бери Ак үйгө келген биринчи чет элдик лидерди тосуп отурат”, – деп айтылат Улуу Британияда жайгашкан уюмдун X каналындагы билдирүүсүндө.
Эл аралык кылмыш соту Израилдин премьер-министри Биньямин Нетаньяхуну жана бул өлкөнүн мурдагы коргоо министри Йоав Галантты кармоого ордер чыгарган. Алар адамзатка каршы кылмыш жана согуш кылмышы үчүн айыпталууда. Аларды кармоону соттун прокурору Карим Хан талап кылган. Израил бул соттун юрисдикциясын тааныбай турганын билдирген. Сот аны таануу зарылчылыгы жок экенин маалымдаган.
Amnesty International Америка Кошмо Штаттарынын Женева конвенцияларына ылайык, согуш кылмыштары үчүн айыпталган адамдарды сот жообуна тартуу же экстрадициялоо боюнча мыйзамдык милдети бар экенин баса белгиледи.
“Аскердик кылмыштарды жасоого жана адамзатка каршы кылмыштар үчүн айыпталган адамдар үчүн “коопсуз башпаанек” болбошу керек”, – деп айтылат билдирүүдө.
Билдирүүдө ошондой эле Американын курал-жарактары согуш кылмыштарында роль ойногонуна көптөгөн далилдер бар, бирок Кошмо Штаттар геноцидди алдын алуу боюнча өзүнө алган милдеттенмелерин аткарбай келери жана анын куралдары Израилдин Газага жасаган аскердик чабуулдарында колдонулуп жатканын билишери айтылат.
Буга чейин маалымат булактары Израилдин премьер-министри Биньямин Нетаньяхунун АКШга жасаган сапарына байланыштуу АКШнын Капитолий имаратынын жанына анын Газа элине каршы кылмыштары үчүн өлкөдө болушун айыптаган нааразылык баннерлери орнотулганын маалымдашкан.
Нетаньяху АКШга кечээ, 4-февралда барып, АКШнын президенти Дональд Трамп менен жолугушту.
Американын CNN маалымат тармагы мурдараак Трамп менен Нетаньяху Газа, Иран боюнча жана Сауд Арабия менен мамилени нормалдаштыруу боюнча өтө маанилүү жолугушууга даярданып жатканын кабарлаган.















