24-февралда Кыргызстандын министрлер кабинетинин төрагасы Адылбек Касымалиев менен Тажикстандын премьер-министри Кохир Расулзода телефон аркылуу сүйлөштү. Бул тууралуу кыргыз өкмөтүнүн расмий сайтында жарыяланды.
Тараптардын аралыктан сүйлөшүүлөрүнүн жүрүшүндө үзгүлтүксүз диалогдун маанилүүлүгү жана алдыдагы биргелешкен иш-чаралардын алкагында жакшы коңшулук мамилелерди жана өнөктөштүктү бекемдөөгө эки тараптуу кызыкчылык баса белгиленди.
Ошондой эле, эки тараптуу кызматташтыктын актуалдуу маселелерин, анын ичинде соода-экономикалык жана маданий-гуманитардык байланыштарды, кыргыз-тажик мамлекеттик чек арасын делимитациялоо жана демаркациялоо боюнча келишимдерди ишке ашыруунун жүрүшүн талкуулашты.
Эскерте кетсек, буга чейин Кыргызстан менен Тажикстандын өкмөттүк делегацияларынын ортодогу мамлекеттик чек араны делимитациялоо жана демаркациялоо боюнча биргелешкен жыйыны Бишкекте, мамлекеттик резиденцияда 21-февралда өткөн.
Ал жыйынга Улуттук коопсуздук боюнча мамлекеттик комитетинин (УКМК) төрагасы Камчыбек Ташиев жана Тажикстандын Улуттук коопсуздук боюнча мамлекеттик комитетинин төрагасы Саймумин Ятимов төрагалык кылган.
Камчыбек Ташиев чек араны талкуулоо боюнча жүргүзгөн иштин жыйынтыгын чыгарып жатып ошол күндү “тарыхый күн” деп атаган.
“Бүгүн тарыхый күн, чек араны макулдашуу аяктады. Эми юридикалык каттоо, андан кийин парламенттер аркылуу ратификациялоо, президенттерибиздин кол коюусу калат. Бүгүн биз Кыргызстан менен Тажикстандын ортосундагы чек араны делимитациялоо боюнча жыйынтыктоочу протоколго кол койдук.
Делимитация жана демаркация боюнча мамлекеттик комиссиялар чек аранын бардык тилкелери боюнча толук макулдашууга жетишкенин расмий билдирет”,- деген ал.
Эки өлкөнүн чек арасынын жалпы узундугу 980 чакырымды түзөт жана тактоо иштери 2002-жылы башталган. 2020-жылга чейин 519 чакырымы толук такталган.
2022-жылы эки мамлекет башчылары жолукканда жалпысынан 664 чакырымга байланыштуу орток пикир бар экенин билдиришкен.


















