УКМК эл аралык баңги заттарын транзиттик ташуу каналын аныктоо жана ага бөгөт коюу максатында жүргүзүлгөн узак мөөнөттүү жана максаттуу ыкчам-издөө иш-чараларынын натыйжасында Баткендеги баңги топтун лидери – Кыргызстандын жараны Т.Д.С.ны кармады. Бул тууралуу коопсуздук органынын маалымат кызматы билдирди.
УКМКнын маалыматына ылайык, кармалган жаран 2015-жылдан бери жашырынып жүргөн жана Ооганстан–Тажикстан–Кыргызстан багыты аркылуу жана андан ары КМШ өлкөлөрүнө баңги заттарды аткезчилик жол менен ташуунун жана сатуу каналын уюштургандыгы үчүн издөөгө алынган.
Жүргүзүлгөн ыкчам-тергөө иш-чараларынын жүрүшүндө издөөдө жүргөн адамдын жүргөн жери аныкталып, андан соң ал кармалып, Кыргыз Республикасынын УКМКсынын тергөө абагына киргизилди.
Учурда кылмыштуу схеманын башка катышуучуларын аныктоо жана алардын аракеттерин документтештирүү боюнча комплекстүү ыкчам-тергөө иш-чаралары жүргүзүлүүдө. Ошондой эле кылмышка тиешеси бар бардык адамдарды Кыргыз Республикасынын мыйзамдарына ылайык кылмыш жоопкерчилигине тартуу боюнча иштер улантылууда.
