АКШ жана Улуу Британиянын расмий өкүлдөрү дүйшөмбү күнү Ирактагы машыгуулар учурунда бир америкалык жана бир британиялык аскер кызматкери каза болгонун билдиришти, бирок кошумча маалымат беришкен жок.
Бул тууралуу Associated Press агенттиги билдирди.
Жоокерлердин өлүмү жекшемби күнү Ирактын түндүгүндөгү жарым-автономиялык күрт аймагындагы Эрбилдеги аба базасында болгонун АКШнын армиясы X социалдык медиа платформасындагы билдирүүсүндө жарыялады. Билдирүүдө каза болгон жоокердин аты-жөнү анын үй-бүлөсүнө кабарлангандан кийин 24 саатка чейин жарыяланбай турганы айтылат.
Улуу Британиянын Коргоо министрлиги өзүнчө билдирүүсүндө британиялык жоокердин үй-бүлөсүнө кабарланганын жана кошумча маалымат жарыялоодон мурун “ойлонууга убакыт” суралганын билдирди.
АКШ Ирактагы “Ислам мамлекети” тобуна каршы күрөшүп жаткан аскерлеринин санын акырындык менен азайтып жатат. Бирок, Вашингтон күрттөр менен байланышын чыңдоого аракет кылып жаткандыктан, америкалык күчтөр күрт аймагындагы катышуусун сактап калууда.
Декабрь айында АКШ күрт аймагынын борбору Эрбилде чоң жаңы консулдук имаратын ачты, бул Вашингтондун аймактагы дипломатиялык жана стратегиялык катышуусун көрсөтүп турат.
Бул өлүмдөр Мароккодогу аскердик операция учурунда эки америкалык жоокер аскадан кулап, каза болгондон бир айга жакын убакыт өткөндөн кийин болгон. Алар 2-майда жыл сайын өтүүчү көп улуттуу “Африка арстаны” аскердик машыгуусуна катышкандан кийин дайынсыз жоголгон.



















