Reuters маалымат агенттигинин билдирүүсү боюнча, Йемендин борбору Сана шаарындагы БУУнун комплексинин ичинде барымтага алынган 20 адам хуситтер тарабынан бошотулду. Алар «Ансар Аллах» кыймылынын өкүлдөрү болгон. Бул тууралуу ТАСС агенттиги кабарлады.
Маалыматка ылайык, бошотулгандардын ичинен 15и — эл аралык БУУ кызматкерлери, калган бешөө — жергиликтүү кызматкерлер.
«БУУнун бардык 15 эл аралык кызматкерлери эми Санадагы уюмдун комплекси боюнча эркин жүрө алышат жана БУУ мекемелери жана өз үй-бүлөлөрү менен байланышта болушат», — деп айтылат билдирүүдө.
БУУнун маалыматы боюнча, калган беш жергиликтүү кызматкер да бошотулган. Ошондой эле хуситтер комплекстин аймагын толугу менен таштап кетишкен.
Эске салсак, 18-октябрда хуситтер Йеменде БУУнун кызматкерлерин шпиондук айыбы менен кармашкан. «Ансар Аллах» кыймылынын куралчан өкүлдөрү алдын ала эскертпестен БУУ объектисине кирип, кызматкерлерди суракка алган. Ошол учурда 11 йемендик бошотулган, бирок 20 кызматкер, анын ичинде 15 чет элдик жаран кармалып турган.
Бул окуя БУУ кызматкерлеринин хуситтер тарабынан кармалышынын биринчи учуру эмес. Сентябрь айында да кыймыл өлкөнүн ар кайсы аймактарындагы БУУ кызматкерлерин Израилдин кызыкчылыгында шпиондук кылган жана «Ансар Аллахтын» лидерлерине каршы чабуулдарга катышкан деп айыптаган. Октябрда БУУ Йеменде өз кызматкерлеринин дагы бир нече жолу кармалганын кабарлаган.
Буга чейин хуситтердин саясий кеңешинин башчысы Израилди «караңгы күндөр» күтүп турганын айткан болчу.


















