14-октябрдан 24-октябрга чейин Тажикстандын Хатлон гарнизонундагы “Фахробод” окуу борборунда Жамааттык коопсуздук келишим уюмуна (ЖККУ) мүчө мамлекеттердин катышуусунда масштабдуу биргелешкен тынчтык орнотуучу аскердик машыгуулары өтүп жатат.
Иш-чара “Жеңилбес бир туугандык — 2025” деп аталып, уюмга кирген өлкөлөрдүн тынчтык орнотуу күчтөрүнүн өз ара аракеттенүүсүн жакшыртууну максат кылат.
Муну менен катар “Тоскоолдук — 2025” деп аталган радиациялык, химиялык жана биологиялык коргонуу, медициналык камсыздоо боюнча атайын окуулар, ошондой эле “Антитеррор — 2025” аттуу терроризмге каршы биргелешкен машыгуулар да өтөт. Бул үч багыттагы окуулар эл аралык коопсуздук жана кризистик кырдаалдарга ыкчам жооп кайтаруу мүмкүнчүлүгүн бекемдөөгө багытталган.
Учурда Тажикстанга Кыргызстан менен Беларусиянын аскер кызматкерлери барып, машыгууга даярдык көрүүдө. 19-октябрга чейин Казакстандан жана Орусиядан да аскерлердин баруусу күтүлүүдө.
Жалпысынан бул машыгууларда Беларусь, Казакстан, Кыргызстан, Тажикстан жана Орусиянын Куралдуу күчтөрү катышып, ар кандай операция этаптарында биргелешкен аракеттерди иш жүзүндө сынашат.
Ушул жылдын 14-сентябрында да ЖККУнун ушундай эле аскердик окуу-машыгуулары Кыргызстанда өткөн. Анын максаты — Борбор Азия аймагындагы Жамааттык ыкчам аракеттенүүчү күчтөрдүн мыйзамсыз куралдуу топторду жок кылуу жана чек арага кирип келген учурларда биргелешип аракеттенүү мүмкүнчүлүгүн чыңдоо болуп саналган.



















