Афганистанда үчүнчү өлкөнүн аскердик инфраструктурасын жайгаштыруу таптакыр кабыл алынгыс экенин Россиянын Тышкы иштер министри Сергей Лавров билдирди.
Министр бул тууралуу Афганистан боюнча Москва форматындагы консультациялардын VII жыйынындагы сүйлөгөн сөзүндө айтканын РБК басылмасы жазды.
Анын айтымына караганда, аймактык оюнчулардан тышкаркы аскерлердин катышуусу туруксуздукка жана жаңы чыр-чатакка алып келиши мүмкүн.
“Афганистандын тарыхы чет элдик аскерлердин катышуусуна байланыштуу көптөгөн кырдаалдарды билет – менин оюмча, ар бир адам эбак эле туура тыянак чыгарышы керек болчу”, – деди министр.
Сентябрь айында АКШнын президенти Дональд Трамп Америка Баграм авиабазасын көзөмөлүнө кайтарып алуу аракетин көрүп жатканын айткан.
Афган өкмөтүнүн басма сөз катчысы Забихулла Мужахид Афганистан АКШ менен мындай келишимге макул болбой турганын билдирген. Ал эми Тышкы иштер министрлигинин башчысынын кеңешчиси Закир Жалали белгилегендей, Кабул өз аймагында башка мамлекеттердин, анын ичинде Американын да аскерлеринин болушун кабыл албайт.















