La Vuelta веложарышынын 5-этабында активисттер Israel-Premier Tech командасынын жүрүшүн тосуп коюшту.
Газага байланыштуу Израилдин аракеттерин эң катуу айыптап келе жаткан ЕБ өлкөлөрүнүн бири болгон Испанияда бул жолу Израилдин велокомандасына каршы нааразылык акциясы өттү.
La Vuelta испан веложарышынын кечээ өткөн 5-этабында, Каталониянын Фигерас шаарынын аймагындагы 24-чакырымда активисттер Israel-Premier Tech командасынын спортчуларынын жүрүшүн токтотуп коюшту.
Нааразы болгондор Палестинанын желегин жана Газадагы Израилдин аракеттерине каршы плакаттарды көтөрүп чыгып, израилдик велоспортчулардын кыймылын убактылуу жайлатышты.
La Vueltaнын башкы директору Хавьер Гийен билдиргендей, эгер нааразылык күч колдонуу менен коштолсо, анда ал мыйзамдуу болбой калат. Ал спортчулар мындан ары тоскоолдуктарга туш болбой турганын баса белгилеп, Фигерастагы акциянын катышуучуларына каршы укук коргоо органдарына расмий кайрылуу болорун билдирди.
Ошол эле учурда Испанияда Палестинаны колдогон бир катар бейөкмөт уюмдар «Израил спортун бойкоттоо платформасы» аттуу кампанияны башташты. Алар Израил өкмөтү Газадагы аскердик кылмыштарды жана геноцидди улантып турган шартта, Израилдин спорттук мелдештерге катышуусуна бөгөт коюуга чакырышууда.
Бул уюмдар социалдык түйүндөр аркылуу Израил командасынын La Vueltaдагы катышуусуна каршы нааразылык акцияларын улантууга үндөп жатышат.


















