БУУнун Бүткүл дүйнөлүк азык-түлүк программасынын аткаруучу директору Синди Маккейн Газа тилкесиндеги азык-түлүк абалын катастрофалык деп атады.
“Абал катастрофалык. Жетишсиз тамактануунун өтө олуттуу көйгөйү бар, адамдар ачкачылыктан өлүүдө”, – деди ал япониялык NHK телеканалына берген маегинде.
Маккейндин айтымында, БУУнун Бүткүл дүйнөлүк азык-түлүк программасы Газага керектүү көлөмдө азык-түлүк берүүгө жөндөмдүү эң ири жана жалгыз уюм, бирок гуманитардык иштерге Израил аскерлеринин аракеттери тоскоол болууда.
“Замбирек, танктар жана башка [куралдар] бизге каратылып турганда, бул абдан кыйын”, – деп кошумчалады ал.
2025-жылдын 2-мартынан тарта Газа тилкесине эл аралык гуманитардык уюмдар менен БУУнун агенттиктеринин жардамдары токтогон. Май айында, салттуу жардам бөлүштүрүү системасына альтернатива катары, Израил Америка Кошмо Штаттарынын колдоосу менен Газа тилкесинин тургундарына тамак-аш жеткирүүнү уюштуруунун жаңы схемасын түзүп, GHF (Газанын гуманитардык жардам фонду) иштей баштаган. Бирок ал жардам тарата баштагандан бери тамак-аш алууга аракеттенген миңден көп киши израилдик аскерлердин колунан каза тапты.
БУУ жана негизги эл аралык гуманитардык уюмдар GHF Израилдин аскердик максаттарын ишке ашыруу үчүн түзүлгөн деген кооптонуудан улам жана негизги гуманитардык принциптер бузулгандыктан алар менен кызматташуудан баш тарткан.
Газанын Саламаттыкты сактоо министрлигинин акыркы маалыматтарына караганда, согуштук аракеттердин натыйжасында тилкеде набыт болгон палестиналыктардын жалпы саны 62 миңден ашты, 157 миңден ашууну жарадар болду. Ал эми жетишсиз тамактануудан жана ачкачылыктан 270 тургун, анын ичинде 112 бала каза болду.


















