Сүйлөшүүлөр негизинен мурунку жолугушууда тараптар алмашкан меморандум долбоорлорун талкуулоого арналат. Дмитрий Песковдун айтымында, бул «татаал сүйлөшүү» болот.
Россия менен Украинанын ортосундагы Стамбулдагы үчүнчү раунддагы сүйлөшүүлөрдүн негизги темасы — мурдагы жолугушууда алмашылган меморандум долбоорлору боюнча маселелер болот. Бул тууралуу Россия президентинин басма сөз катчысы Дмитрий Песков билдирди.
«Башкы талкуу мурунку жолугушуу учурунда алмашылган меморандум долбоорлору боюнча болот. Ошондой эле өз ара туткундарды алмашуу сыяктуу маанилүү процессти улантуу боюнча сүйлөшүү өтөт. Керек болсо башка маселелер да көтөрүлүшү мүмкүн. Мындай чечимдерди делегация башчылары кабыл алышат», — деп Д.Песков айткандыгын РБК маалымат агенттиги билдирди.
Россиялык делегация Москвадан Стамбулга сүйлөшүүлөр үчүн 22-июлда учуп кетти. Сүйлөшүүлөр 23-июлда Москва убактысы боюнча саат 19:00дө башталат.
Песков белгилегендей, азырынча Россия бул раунддан эмнени күтүп жатканын айтуу кыйын. Ал муну «татаал сүйлөшүү» деп атап, украин жана орус тараптарынын долбоорлору «диаметралдуу карама-каршы» экенин айтып, «оңой жол» болбой турганын кошумчалады.
Украина президенти Владимир Зеленский Стамбулда Россия менен туткундарды алмашуу, балдарды кайтаруу жана лидерлердин жолугушуусуна даярдык маселелерин талкуулай турганын билдирген.
Песков өз кезегинде, меморандумдарды макулдашуу боюнча жүрүп жаткан иштер — бул лидерлердин жолугушуусуна даярдык экенин белгиледи. «Бул татаал иш жасалмайынча, лидерлердин жолугушуусун дароо белгилөө жарабайт. Болбосо, эң жогорку деңгээлде ушул оор жана узак иштерди жүргүзүүгө туура келет», — деди ал.
«РБК Украина» өз булактарына таянып билдиргендей, Киев сүйлөшүүлөрдүн башкы темасы катары лидерлердин жолугушуусуна даярдыкты көрүү деп эсептейт.
Президент Владимир Путин буга чейин бир нече жолу, Орусия Украина менен, анын ичинде жогорку деңгээлде сүйлөшүүгө даяр экенин билдирген. Бирок бул үчүн алгач конкреттүү макулдашуулар болушу керек экенин айткан. Россия «алдын ала шарттарсыз дароо сүйлөшүүлөрдү баштоо» керек деп эсептейт жана ок атышууну сүйлөшүүлөрдөн мурда токтотууну мүмкүн эмес деп санайт. Киев болсо, тескерисинче, сүйлөшүүлөргө чейин 30 күндүк ок атышууну токтотууну талап кылууда.
















