Бүгүн, 20-март күнү, Кыргызстандын футбол боюнча Улуттук курама командасы, конокто Өзбекстан курама командасы менен беттешет. Жолугушуу Ташкенттеги «Бунёдкор» стадионунда Бишкек убактысы боюнча саат 22:00дө старт алат.
Бул оюн FIFAнын 2026-жылкы Дүйнө чемпионатынын тандоо оюндарынын үчүнчү раунду алкагында өткөрүлөт.
Кыргызстандык футболчулар үчүн бул – жооптук беттеш болуп саналат. Анткени командалар 2024-жылдын сентябрында бул раундда кез келип, анда өз үйүндөгү болгон беттеште биздин курама 2:3 эсебинде жеңилүү ызаасын тарткан.
Беттешти түз алып берүүсү УТРК Спорт каналында, ошондой эле КСТВ каналынын кабелдик тармактарында (Мегалайн, Неотелеком, Акнет) көрсөтүлөт.
Өзбекстан үчүн да бул оюн өтө маанилүү болуп саналат. Анткени алар 13 упай алып, тайпада экинчи орунду ээлеп турганы менен дүйнөлүк мундиалга чыгууга аз эле кадам калганды, ошол үчун бул Кыргызстан менен боло турган беттешке болгон күчүн жумшашат.
Ал эми Кыргызстан тайпада 3 упай менен 5-орунда. Биздин Ак шумкарлар үчүн да бул оюн дээрлик чечүүчү беттеш. Анткени экинчи орун менен чыкпаса да, 3-4-орун менен кийинки этапка өтүүгө мүмкүнчүлүк бар. Эгер ага да жетише албай калса, дүйнөлүк чемпионатка жолдомону ута албай калат. Ошондуктан эң маанилүү оюн бүгүн болот.



















