Кыргызстан менен Бириккен Араб Эмираттары (БАЭ) мамлекеттик башкарууну институционалдык өнүктүрүү жана модернизациялоо жаатында тажрыйба алмашууга багытталган өз ара түшүнүшүү жөнүндө меморандумга кол коюшту.
Өкмөттүн басма сөз кызматы билдиргендей, документ жаңы беш жылдыкка эсептелген. Кол коюу аземи Дубайда өткөн Дүйнөлүк өкмөттүк саммиттин алкагында болду.
Меморандумга Министрлер кабинетинин төрагасы Адылбек Касымалиев менен БАЭнин Министрлер кабинетинин иштери боюнча министри Мохаммед Абдулла Аль Гергави кол коюшту.
Меморандум институционалдык потенциалды чыңдоону, өкмөттүн өнүгүү процесстерин өркүндөтүүнү, келечектеги өнүгүү үчүн мүмкүнчүлүктөрдү түзүүнү жана эки тарапты кызыктырган башка тармактарда кызматташууну карайт.
Эске сала кетсек, 11-13-февраль аралыгында Дубайда “Келечектин өкмөттөрүн калыптандыруу” (WGS 2025) темасындагы 12-Дүйнөлүк өкмөт саммити өтүп жатат.
Бул жолку саммитке 30га жакын өлкөнүн мамлекет башчылары жана лидерлери, ошондой эле 140 өкмөттөн келген делегациялар, жогорку технологиялык фирмалардын жетекчилери жана эл аралык уюмдардын өкүлдөрү катышууда.
Саммиттин максаты – эл аралык кызматташтыкты чыңдоо жана актуалдуу глобалдык көйгөйлөрдүн натыйжалуу жолдорун табуу.
Өз ара түшүнүшүү жөнүндө меморандум институционалдык потенциалды чыңдоо боюнча биргелешкен аракеттерди өнүктүрүүгө, өкмөттөрдү өнүктүрүү процесстерин өркүндөтүү боюнча биргелешкен аракеттерди түзүүгө, келечекке багытталган мүмкүнчүлүктөрдү түзүүгө, ошондой эле кызматташтыктын башка өз ара макулдашылган тармактарына багытталган.





















