Палестиналык ХАМАС тобу ок атышууну токтотуу келишиминин алкагында дагы төрт израилдик барымтадагыларды Эл аралык Кызыл Крест комитетине өткөрүп берди. Израилдин Коргоо күчтөрүнүн (IDF) басма сөз кызматы өткөрүп берүүнү тастыктады.
“Бүгүн, уланып жаткан аракеттердин бир бөлүгү катары биз ХАМАСтын туткунунда 477 күндөн кийин дагы төрт израилдикти тосуп алдык: Лири Альбаг – 19 жаш, Нааму Леви – 20 жаш, Карина Ариев – 20 жаш, Даниэлл Гильбоа – 20 жаш”, – деп айтылат билдирүүдө.
Израиль армиясынын маалыматы боюнча, 2023-жылдын 7-октябрында Израилдин аймагына кол салуу учурунда ХАМАС тарабынан Нахал Оздон төрт аскер барымтага алынган. Кыздар Газа тилкеси менен чек арага жакын жерде байкоочу пунктта болушкан.
Кыздарды буга чейин Израил армиясынын өкүлдөрү тосуп алганы жана алар буга чейин Израилдин чек арасынан өтүп кетишкени такталган.
Газа тилкесиндеги ок атышпоо келишими эки тараптын макулдашуусу менен 19-январда күчүнө кирген. 17-январда израилдик маалымат каражаттары келишимдин биринчи этабынын алкагында Израилдин түрмөлөрүндө жаткан палестиналык туткундарга алмаштырыла турган 33 адамдын тизмесин жарыялаган.
Барымтага алынгандар Израилдин түрмөлөрүндө жаткан палестиналык туткундар менен айырбашталат.
Газадагы ок атышууну токтотуу боюнча макулдашууга ылайык, туткунга түшкөн бир аскер кызматкери үчүн Израил соттолгон 50 палестиналыкты, катардагы бир жаран үчүн 30 палестиналыкты бошотушу керек.
19-январда ХАМАС алгачкы үч туткунду бошоткон. Израил буга жооп катары 90 палестиналыкты коё берген. Алардын көпчүлүгү Иордан дарыясынын батыш жээгине жөнөтүлгөн.
ХАМАС Газадагы ок атышууну токтотуу боюнча макулдашуунун негизинде биринчи этапта бошотушу керек болгон 33 туткундун тизмесин даярдаган. Андагы туткундардын ысымы Израил тарапка жума күнү жөнөтүлүп, айырбаштоо жараяны ишембиде болору божомолдонууда.
Израил буга жооп катары жалпысынан эки миңдей палестиналыкты абактан бошотот.
