Кечээ, 7-январь күнү Сауд Арабиянын бир катар шаарларын, анын ичинде мусулмандардын ыйык Мекке шаарынын көчөлөрүн суу каптады.
Меккеде бир нече күн нөшөрлөп жааган жаандан улам көчөдө токтоп турган автоунаалар сууда калкып калгандыгы тартылган видеолор соц. тармактарга жүктөлүүдө. Көрүнүп тургандай, айрым жерлерде суу үйлөрдүн чатырына чейин жеткен.
Ошол эле учурда нөшөрдү катуу шамал коштоп, көчө боюндагы темир курулмаларды, буюмдарды учурган.
Daily Mail басылмасынын маалыматына караганда, Сауд Арабиянын Метеорология башкармалыгы жаратылыш шарттарынын кооптуулугу Мекке, Медина шаарлары менен Жидда порт шаарында жогорку (кызыл) деңгээлде деп белгиледи.
Кээ бир эксперттердин пикирине караганда, XX кылымдын аягында аймактын тез өнүгүп жатканын байкаган шаар куруучулар катуу жаан-чачындын жыштыгын жана суунун мынчалык тез топтолушу адаттагы кургакчылыкка кандай таасир этиши мүмкүн экенин алдын ала эске алган эмес.
Сауд Аравиянын жарандык коргонуу башкы башкармалыгы жарандарды сак болууга жана коопсуздук эрежелерин сактоого чакырды.


















