Тек жайын аныктоо боюнча онлайн тесттин, эски сүрөттөрдүн жана гезиттердин кыркындыларынын жардамы менен 1951-жылы алты жашында уурдалган баланы жакындары полициянын, ФБРдин жана Юстиция министрлигинин кийлигишүүсү менен таап алышты.
Бул тууралуу Associated Press 22-сентябрда билдирди.
Луис Армандо Альбино 1951-жылы Калифорниянын Окленд шаарындагы сейил бакта ойноп жүргөн жеринен уурдалганда алты жашта болчу. Агенттиктин маалыматына караганда, алты жаштагы Альбинону улуу агасы менен ойноп жүргөн Окленд паркынан момпосуй сатып берем деп бейтааныш аял алдап уурдап, баланы өлкөнүн Чыгыш жээгине алып кеткен. Бул жерде алар аны өз уулундай тарбиялап чоңойтушат.

Альбино Вьетнамда кызмат өтөгөн жана учурда ал АКШнын деңиз жөө аскерлеринин ардагери. Кийинчерээк өрт өчүрүүчү болуп да иштеген, дейт анын жээни 63 жаштагы Алида Алекин.
“70 жылдан ашык убакыттан бери дайыны жок болгонуна карабай, “ал дайыма үй-бүлөнүн жүрөгүндө сакталып жүргөн жана анын сүрөтү туугандарынын үйүндө илинип турчу”, – дейт жээни.
Альбино тирүү экенинен үмүт үзбөгөн Алекин 2020-жылы жөн гана “көңүл үчүн” онлайн ДНК тестин тапшырат. Анын жыйынтыгы таякеси болгон адам менен 22 пайыздык дал келүүнү көрсөтөт. “Бирок Альбинону андан кийинки ар кандай издөөлөр эч кандай жыйынтык берген жок”,-дейт ал.
2024-жылдын башында Алекин кыздары менен Альбинону кайра издей башташат. Окленд коомдук китепканасына барганда ал “Окленд Трибюнундагы” макалаларды, анын ичинде Луи менен анын бир тууганы деген Роджердин сүрөтү бар макалаларды көрүп чыккандан кийин, издөөсүн андан ары улантып, ошол эле күнү Окленд полициясына кайрылат.
Алекиндин айтымында, 20-июнда тергөөчүлөр алардын үйүнө барып, таякеси табылганын сүйүнчүлөшөт.
24-июнда ФБРдин жардамы менен Луис үй-бүлө мүчөлөрү менен Оклендге барып, Алекин туугандары менен жолугушкан. Эртеси Алекин өзүнүн апасы менен таякесин Калифорниядагы Роджердин үйүнө алып барат.


















