Борбор Азиянын футбол ассоциациясынын 20 жашка чейинки жаштар арасындагы футбол чемпионаты алкагында Кыргызстандын жаштар курамасы 9-июль күнү Тажикстанга каршы оюн өткөрдү. Аталган беттеш 0-0 эсебиндеги тең чыгуу менен аяктады.
Ушуну менен командалар бирден упай алышып (жалпы 4төн упай топтошту), голдордун айырмасы менен Кыргызстан жаш футболчулары финалга жолдомо алышты.
Ушул эле күнү Өзбекстан менен Иран беттешип, жыйынтыгында эсеп 1:1 болуп, тең чыгуу орун алды. Бирок голдордун айырмасы менен ирандык жаштар да финалга чыгышты.
Ошентип бул турнирдин финалында Кыргызстан менен Иран 12-июлда саат: 22:00дө беттешип, 1-2-орун үчүн күч сынашат.
Ушул эле күнү 17:00дө 3-4-орун үчүн Өзбекстан менен Тажикстандын футболчулары беттешет. Ал эми 11-июль күнү 5-6-орунга Түркмөнстан менен Ооганстан күч сынашат.
Эске салсак, аталган эл аралык мелдеш Жалал-Абад шаарынын «Курманбек» стадионунда Ооганстан, Иран, Кыргызстан, Тажикстан, Түркмөнстан жана Өзбекстандын командалары катышуусунда өтүүдө.
Мелдештин чүчүгулагынын жыйынтыгында жаштар курама командабыз «А» тайпасында Тажикстан жана Ооганстан командалары менен бирге жайгашкан.






















