Армениянын премьер-министри Никол Пашинян 23-ноябрда Беларусиянын Минск шаарында өтө турган Жамааттык коопсуздук келишим уюмунун (ЖККУ) кезектеги саммитине катышпайт. Бул тууралуу армян өкмөтүнүн басма сөз кызматы билдирди.
Маалыматка караганда, Пашинян саммитке катыша албай тургандыгы жөнүндө Беларустун башчысы Александр Лукашенко менен телефондо сүйлөшкөндө айтып, уюмдун калган мүчөлөрү “бул чечимди түшүнүү менен кабыл алат” деген үмүтүн билдирген.
Буга чейин Армения КМШдан жана ЖККУдан чыгышы мүмкүн экени айтылган. Бирок Пашинян жана Армениянын Тышкы иштер министрлигинин өкүлдөрү Ереван учурда ЖККУдан чыгуу мүмкүнчүлүгүн талкуулабай турганын бир нече жолу билдиришкен. Бирок 2009-жылдан бери ЖККУнун бардык саммиттерин калтырбай катышып келишкен Армениянын жетекчилери уюмдун акыркы айлардагы иш-чараларына катышпай келишет. Армения ошондой эле ЖККУдагы элчисин да чакыртып алып, дипломатиялык миссиянын жаңы жетекчисин дайындай элек.
Алсак, 26-октябрда Пашинян Бишкектеги ЕАЭБ менен КМШнын өкмөттөр аралык кеңештерине барган эмес. Бул жолугушууга Азербайжан өкмөтүнүн башчысы Али Асадов да катышпай калган. Буга чейин 13-октябрда Армениянын премьер-министри Бишкекте өткөн КМШ саммитине катышуудан баш тарткан. Мындан тышкары, Армениянын Коопсуздук кеңешинин катчысы Армен Григорян 8-ноябрда Москвада өткөн КМШ өлкөлөрүнүн коопсуздук кеңештеринин катчыларынын кезектеги жыйынына келүүдөн баш тарткан. Мындан тышкары, армян аскерлери Балыкчыда өткөн ЖККУнун машыгуусуна да катышкан эмес.



















