Йемендик булактар хуситтердин Сауд Арабиясына каршы 25-октябрда баштаган «максималдуу басым» саясаты мындан ары да толук күчүндө улантыларын билдиришти. Бул тууралуу иран ЖМКлары жазышты.
Бул булактар 25-26-октябрь күндөрү Сауд Арабиясынын объектилерине жана анын тарапташ күчтөрүнө каршы 250дөн ашык ракета жана учкучсуз учуучу аппарат колдонулган масштабдуу, мурда болуп көрбөгөндөй чабуулдар жасалганын билдиришкен. Алардын айтымында, Сауд Арабиясынын аймагындагы терең жайгашкан объектилерге жасалган соккулар жаңжал башталгандан берки эң масштабдуу чабуулдардын катарына кирет.
Йемендик булактардын билдиришинче, бул күндөрү биринчи жолу 1 500 фунттук (болжол менен 680 килограмм) согуштук бөлүгү бар баллистикалык ракеталар Эр-Рияд эл аралык аэропортуна сокку уруу үчүн колдонулган. Алар бул чабуул олуттуу зыян келтиргенин белгилешкен.
Маалыматка ээ булактар Йемендин Сана шаарындагы аэропорт кайра ачылып, иштей баштамайынча Эр-Рияд эл аралык аэропортунун иштешине жол берилбей турганын билдиришкен. Алардын айтымында, Эр-Рияд аэропортунун иштеши Сауд Арабиясынын бийлигинин гана эмес, Йемен армиясынын да аракеттерине байланыштуу.
Мындан тышкары, Даммам жана Жидда аэропортторуна үзгүлтүксүз чабуулдар уланып жатканы айтылууда. Абха аэропорту иш жүзүндө жабылганы да белгиленген.
Йемендик хуситтер Сауд Арабиясына Сананын талаптарын аткарууну кечеңдеткен ар бир күн башка иштеп жаткан аэропорттордун да жабылышына алып келиши мүмкүн экенин эскерткени кабарланууда. Ошондой эле Даммам жана Жидда аэропортторун толугу менен иштен чыгаруу ниети бар экени айтылууда.
Маалыматтарга ылайык, Эр-Рияддан болжол менен 400 чакырым батышта жайгашкан Касим аэропортуна да ракеталык сокку урулган. Сауд Арабиясы Эр-Рияд эл аралык аэропортунун ишин ошол жакка көчүрүүнү пландап жатканы айтылат.
Йемендик булактардын маалыматына караганда, жекшемби жана дүйшөмбү күндөрү Сауд Арабиясынын Хижаздын түштүгүндөгү аскердик жана экономикалык борборлоруна, ошондой эле оккупацияланган үч провинциядагы объектилерге жасалган чабуулдар өлкөнүн аскердик мүмкүнчүлүктөрүнө олуттуу зыян келтирген.
Алардын билдиришинче, Хамис-Мушайт аба базасына эки күндүн ичинде 40тан ашык ракета жана 20га жакын чабуулчу дрон менен сокку урулган. Натыйжада бир катар учактар, радардык системалар, ок-дары сактоочу кампалар, техникалык тейлөөчү ангарлар жана башкаруу борборлору талкаланганы айтылууда.
Йемендик булактар Жизан провинциясындагы Сауд Арабиясынын деңиз аскер базасына жасалган чабуулдан бир нече кеме жок кылынганын билдиришкен. Кемелердин так түрү белгисиз бойдон калууда. Бирок алар десанттык жана камсыздоо кемелери болушу мүмкүн экени айтылган.
Ошол эле маалыматта Сауд Арабиясы Кызыл деңиздеги аскердик кемелерине сокку урулушунан чочулап, аларды түндүктөгү Акаба портуна көчүргөнү айтылат. Мындан тышкары, Нажран провинциясынын алыскы аймагындагы Шарура тик учак базасына да катуу сокку урулганы, бирок келтирилген зыяндын көлөмү азырынча белгисиз экени маалымдалган.
Инфраструктуралык объектилерге жасалган чабуулдар тууралуу сөз кылган йемендик булактар Медина шаарынын түндүгүндөгү бийик тоолуу аймакта чыгыштан батышка кеткен мунай куурунун кеминде үч насостук станциясына сокку урулуп, алар иштен чыгарылганын белгилешкен.
Алардын маалыматына ылайык, акыркы 100 күндүн ичинде Сауд Арабиясынын мунай объектилерине жасалган чабуулдар өлкөгө 100 миллиард долларлык зыян алып келген.
Ошол эле учурда Bloomberg агенттиги Saudi Aramco мунай компаниясы учурдагы каржылык кыйынчылыктарды жөнгө салуу үчүн чет өлкөлүк булактардан 10 миллиард доллар насыя алууга өтүнүч бергенин кабарлаган.
Жалпысынан, йемендик булактар куралдуу күчтөрдүн «максималдуу басым» саясаты башталганын жана аракеттер өз ара жооп кайтаруу баскычынан чыгып кеткенин билдиришүүдө. Алардын айтымында, Сауд Арабиясынын акыркы 48 саат ичинде Йемендеги турак жайларга жана шаардык инфраструктурага жасаган чабуулдарынын натыйжасында 20 жай тургун каза болуп, дагы ондогон адам жаракат алган. Каза болгондордун арасында аялдар жана балдар болгондугу айтылууда.
Булактар бул окуялардан кийин Йемендин саясий жетекчилиги аскердик командирлерге кыйратуучу жана оор соккуларды жасоо үчүн кеңири мүмкүнчүлүк бергенин белгилешкен.
Йемендик тарапташтар мындан ары дагы татаал жана күчтүү чабуулдарды күтүүгө чакырышууда. Алардын пикиринде, Сауд Арабиясынын бийлиги Йемендеги согуш үчүн чоң чыгым тартып жатканын моюнга алгысы келбейт. Согуш улана берген сайын өлкөнүн бийлиги үчүн экономикалык жоготуулар көбөйүп, аларды калыбына келтирүү барган сайын кыйын болууда.
Маалыматта акыркы бир айдан ашык убакыттан бери Йемендин айрым аймактарында мектептер жана көптөгөн мамлекеттик мекемелер жабык турганы, электр энергиясын өндүрүүнүн кыскарышынан улам өнөр жай ишканаларынын бир бөлүгү да ишин токтоткону айтылат.


















