АКШнын шайланган президенти Дональд Трамптын администрациясы 21-январдан тарта, башкача айтканда инаугурациянын эртеси эле мыйзамсыз иммигранттарды массалык депортациялоо боюнча Трамтын шайлоо алдындагы убадаларын ишке ашыра баштайт.
Бул тууралуу Wall Street Journal (WSJ) булактарга таянып билдиргенин ТАСС агенттиги жазды.
Маалыматта белгиленгендей, биринчи мигранттарга каршы ири рейд Чикагодо (Иллинойс штаты) шейшемби күнү эртең менен башталып, жуманын аягына чейин уланат. Операцияга АКШнын иммиграция жана бажы кызматынын 200дөй кызматкери катышат.
Алардын максаты биринчи кезекте кылмыштуулу болгон мыйзамсыз мигранттар болот, деп жазат гезит. Басылма белгилегендей, Чикагодон кийин мигранттардын рейддери Нью-Йоркто, Лос-Анжелесте (Калифорния), Денверде (Колорадо) жана Майамиде (Флорида) болот.
Буга чейин CNN телеканалы Трамптын командасы 20-январдагы инаугурациядан бир нече сааттан кийин жарыялана турган “катаал иммиграция” мыйзамдар чарасынын пакетин жарыяларын кабарлаган.
CNN булактарынын айтымында, бул АКШда жашаган иммигранттарга, ошондой эле АКШ-Мексика чек арасынан башпаанек издегендерге каршы репрессиянын башталышы болот.
Мыйзамсыз иммигранттарды массалык түрдө чыгаруу пландарына ири шаарларда иммиграция жана бажы инспекцияларын текшерүүлөр, Пентагондун кошумча ресурстарын түштүк чек арага жөнөтүү жана өлкөгө кирүү үчүн чоң чектөөлөрдү киргизүү кирет.
Миграция кризиси Кошмо Штаттардагы шайлоо жарышындагы негизги маселелердин бири болуп калды. Анын кескин курчушу үчүн республикачылар иш жүзүндө учурдагы президент Жо Байдендин администрациясын жана демократтарды күнөөлөшүүдө.
Трамп буга чейин да бир нече жолу инаугурациядан кийин мыйзамсыз иммигранттарга каршы Америка тарыхындагы эң ири депортация операциясын жүргүзүү ниетин билдирген. Алгачкы этаптарда 1 миллион адамды өлкөдөн чыгаруу пландалып жатканы маалымдалган.
Жозеф Байдендин президенттиги учурунда Америка аймагына кирген мыйзамсыз мигранттардын саны 15 миллионго жеткенин АКШнын Өкүлдөр палатасынын төрагасы Майк Жонсон да билдирген. Алардын ичинде борбор азиялык мигранттар да бар. Бирок, АКШынын жаңы бийлиги жарыялаган депортация баары үчүн эмес, мыйзамсыз киргендер үчүн гана.
Буга чейин Нью-Йорктогу “Union KG-NY” – кыргыз диаспорасынын координатору Рыскулбек Султанов “миңдеген кыргызстандыктар бар” дегенибиз менен кыргыз мигранттары Америка үчүн “аз” эле экенин “Евразия тудей” сайтына билдирген.
Султановдун айтымына караганда, Америка Кошмо штаттарындагы мигранттардын көпчүлүгу Африка өлкөлөрүнөн, Индия жана Кытайдан келишкен. Депортация баары үчүн эмес, мыйзамдуу документтери толук, патент менен иштеген мигранттарга тиешеси жок.
АКШны 2017-2021-жылдары да башкарган Трамптын инаугурациясы 20-январда өтөт.
















